Atualità
Durnwalder muef ncuei per l Kenia, Uganda y Sudan per vijité proiec de sustëni
USP – Ncuei, lunesc 8 de fauré muef l presidënt dla Provinzia Luis Durnwalder per n viac de diesc dis tl’Africa. Tla ncëria de assessëur per culaburazion de svilup dla Jonta provinziel vijiterà Durnwalder de plu proiec de svilup tl Kenia, Uganda y tl Sundan dl Sud, che vën finanziëi dala Provinzia de Bulsan.
L fin dl viac ie chël de cialé do de persona tan inant che ie i proiec de svilup finanziei cun mesuns provinziei. “Te d’autri cuntinënc sciche tl’America dl Sud o ti paejes plu pueresc dl’Asia ie miureda la situazion, ma te truep paejes dl’Africa ie la populazion mo for stizeda sun aiuc da oradecà” spiega l Presidënt dla Provinzia.
Durnwalder vën cumpanià sun l viac dal diretëur de Cabinet Klaus Luther y la diretëura dl Ufize per cuestions de Cabinet Elisabeth Spergser, muan cun n jol da Minca. L ie udù dant de ruvé de reviers n mierculdi 17 de fauré. Ntan la vijites ti trëi paejes africans dëssel unì cialà do co che i mesuns finanziei dla Provinzia ie unic adurvei ti proiec de svilup y sce n arjonj i obietives che l’aministrazion provinziela se à tëut dant.
as
