Atualità
Berger anconta i maestri de schi: marcià dl daunì
USP – I tëmps che maestri de schi, mëinacrëp y mëinaschi ova l’esclusiva, ie passei. “Aldò dla norma europea per servijes possa chësta categuries de lëur pité servijes te dut l rain europeich”, nsci l assessëur Hans Berger che se à cunsià cun i maestri de schi co che n possa garantì la cualità tenian cont dla cundizions atueles. Tl’ancunteda iel nce unì rujenà dla lege cheder statela per i maestri de schi.
La normes europees toca nce i mestieres alpins. “Dant o do messerà duc i mestieres de servisc se adaté ala situazion nueva y la Provinzia messerà nce adaté la regules aldò” sorissea l assessëur Berger. L prinzip muessa vester chël che ti servijes alpins vëniel garantì la cualità de servisc y la segurëza per l tlient. N se damanda pra servijes tl alpinism perchël na furmazion aldò. “Propi la furmazion regulamenteda drët avisa, nes sarà de gran utl per se la fé valëi sun l marcià dl daunì”, dij l assessëur. La se trata nce de tenì i servijes a n livel aut de cualità. “La cundizions nueves dates dala cuncurënza europea possa me cun l mpëni y la scumenciadiva dla scoles de schi deventé na nueva chance” dij Berger.
Cun i reprejentanc dla Camera di maestri de schi y dl ufize provinziel per l alpinism, iel nce unì rujenà co jì inant n cont dla lege statela di maestri de schi. “La Provinzia de Bulsan à te chësc ciamp cumpetënza primera, ma mpo nes iel mpurtant savëi cie che l Stat se damanda” dij l assessëur. De nteres provinziel ie de mantenì la cumpetënza y tl medem tëmp de purté inant nteresc canche l vën laurà ora la lege statela.
as
