Atualità

Museums | 10.02.2010 | 12:25

Prejentà la Trienala Ladina y l pest de scultura „Agreiter“

USP – L Museum Ladin Ciastel de Tor à scrit ora doi cuncorsc per sustenì artisc’ dla valedes ladines. L pest dunà da Richard Agreiter ie scrit ora per scultëures tl Tirol storich cun la valedes ladines dla Dolomites. Ala Trienala Ladina tl Museum Ladin possa fé pea atisc’ ladins dla Dolomites, di Grijons y dl Friul. Tramedoi cuncorsc ie unic prejentei ncuei, 10 de fauré, a Bulsan.

I doi cuncorsc dl Museum Ladin Ćiastel de Tor ie scric ora per artisć defrënc y à nce n tema defrënt.
La mostra „Trienala Ladina“ vën metuda a jì per sustenì artisć dla cin valedes ladines dla Dolomites ladins. Da nuef permez al’ultima edizion ie che n à nce giaurì l cuncors ai artisć di Grijons y dl Friul. „L dëssa vester na porta che gëura oravier“ à sorissà l diretëur dla Repartizion per la Cultura ladina Alexander Prinoth. L cuncors per fé pea chësta mostra ie nce davierta a artisć che se sënt ladins y che à n liam cun la storia, la cultura y la tradizions ladines. Nce te si terza edizion dla Trienala, uelen valorisé y sustenì l’ert ladina ti pitan ai artisć l mesun de se prejenté a n majer publich. L tema da chëst ann ie „Tl museum per comuniché...“ y l possa unì purtà dant te d’uni sort de esprescion artistica sciche la pitura, la grafica, scultura, nstalazion o ert conzetuela. I cin lëures che vencerà l cuncors puderà unì metui ora te na mostra tl Museum Ladin a San Martin de Tor.

L pest de scultura „Richard Agreiter“ ie destinà a scultëures che lëura y vif ti raions dl Tirol storich (Tirol dl Nord, Tirol dl Ost, Südtirol y Trentin) y tla valedes ladines de Badia, Gherdëina, Fascia, Fedom y Ampëz. L vën damandà che i scultëures ebe n liam particuler cun la cultura, la storia y la tradizion dl post. Tres chësc pest uelen sustenì l’ancunteda y l barat culturel danter artisć ladins y chëi dl’autra pertes dl Südtirol, Trentin y dl Tirol. L cunesciù artist Richard Agreiter à abù chësta idea y à nce dunà l pest de 10.000 euro. Ala fin dl ann passà à Agreiter giapà dal Presidënt dl’Austria l titul da prufessëur y ie nce cumëmber de unëur dla lia „Südtiroler Künstlerbund“. Tla cunferënza stampa al di che l se mbincia che chësc pest posse deventé n pest artistich de inuem europeich. L pest de scultura „Richard Agreiter“ ie bele unì scrit ora per l segondo iede. L prim, scrit ora dan trëi ani ova venciù Gerhard Demetz y Hubert Kostner.

Tramedoi scumenciadives ie unides prejentedes ncuei danmesdì (10 fauré) te na cunferënza stampa tl palaz Widmann a Bulsan. L valor de chisc doi cuncorsc à nce sorissà l presidënt y l diretëur dl Museum Ladin Heinrich Huber y Stefan Planker, deberieda cun Herwig Prinoth, curator scientifich dl Museum Ladin.

I artisć possa mandé ite si prupostes per tramedoi cuncorsc nchin ai 11 de merz 2010 (dala 17.00). L mostra unirà pona giaurida deberieda cun la premiazion dl pest de scultura Richard Agreiter, ai 23 de lugio 2010 tl Museum Ladin Ćiastel de Tor y resterà davierta nchin ala fin de utober de chësc ann.

Nfurmazions plu avisa n cont di doi cuncorsc, per la Trienala Ladina y l pest Agreriter, possen damandé do tl Museum Ladin a San Martin de Tor, telefonn 0474 524020, e-mail info@museumladin.it o sun la plates internet www.museumladin.it.

Richard Agreiter
L scultëur Richard Agreiter ie nasciù dl 1941 tl Böhmen da genitores dla Val Badia che ntan l Opzion fova ruvei a Steinberg am Rofan tl Tirol. Agreiter À fat la scola d’ert a Dispruch, à laurà dal 1962 al 1964 da scultëur tla Svizra y à pona studià scultura dal 1969 al 71 tl’ Académie Royale des Beaux Artes a Brüssel. Si culezion de scultures al dunà al Museum Ladin Ćiastel de Tor.