Atualità
Culaburadëures provinziei miurea si ladin aministratif
USP – Ai culaburadëures provinziei ladins ti vëniel pità n curs de ajurnamënt de rujeneda ladina aministrativa. L se trata de n workshop un n iede al mëns che scumëncia ai prims de merz. L fin dl curs ie de miuré la cumpetënza dla rujeneda ladina tla materia aministrativa y de miuré la cualità dl servisc provinziel tl cuntat cun la populazion ladina.
Nchin ai 25 de fauré possa i culaburadëures provinziei che se nuzea dla rujeneda ladina ntan si lëur, mo se scrì ite al curs de ladin aministratif. Un n iede al mëns uniral tenì n’ancunteda tla bibliotech dl Istitut Pedagogich ladin a Bulsan. L fin dl curs ie chël de jì plu sot ala gramatica y ortografia ladina tres n scrì creatif. La prima ancunteda sarà ai 4 de merz y jirà inant per 8 mënsc nchin ala fin dl’ann. Tres la culaburazion danter l Ufize provinziel per l personal y l Istitut Ladin Micurà de Rü, iel stat mesun giapé Daria Valentin a tenì l curs.La furmazion de ladin aministratif vën piteda sun nteressamënt dl assessëur provinziel ladin per miuré l’adurvanza dla rujeneda ladina tl’aministrazion provinziela. “Seguré la cualità dla rujeneda ladina te cuestions aministratives juda nce pro a valorisé y svilupé inant l ladin sciche rujeneda aministrativa.” sorissea Florian Mussner.
as
