Atualità
La Cunsulta culturela ladina azetea feter 100 dumandes
USP - La Cunsulta provinziela per la cultura ladina se à ancuntà per tò tres la prima pert dla dumandes de cuntribuc da chëst ann. Nce tl 2010 ti uniral dat priorità al’ativiteies cultureles permez ai nvestimënc. L ann passà oven scumencià a dé ora cuntribuc cun manco burocrazia, aldò dla bona esperienza uniral nce chëst ann jit inant sun chësta streda.
Te si prima senteda dl ann à la Cunsulta culturela ladina tëut tres 109 dumandes de cuntribuc. La majera pert fova dumandes per ativiteies cultureles de lies y artisć che ova messù unì dates ju nchin ai prim de fauré. Feter duta la 83 dumandes à pudù unì azetedes y me per pueces se à la Cunsulta damandà mo vel spiegazion sëuraprò. “Nce chëst ann ulons dé priorità al’ativiteies ajache son dla minonga che tres chëstes possa nce na majera cumpëida de persones se nuzé di cuntribuc provinziei” spiega l assessëur ladin Florian Mussner. Tla senteda stata ai 10 de fauré a Bulsan à i cin cumpunënc nce tëut tres 26 dumandes per nvestimënc da pert dla lies che fej atività culturela ladina. Chësta sort de dumandes possa mo unides mandedes ite ntan dut l ann.
Per tò ju pëis burocratich ai ulenteres che se dà ju cun la cultura ladina, vëniel per l’atività ordinera dat ora nchin a 3.000 euro te na forma plu scëmpla. Mpede messei dé ju la contes, bastel per chësta somes documenté l’atività che ie unida fata. La contes muessa la lies me tenì su n cajo de cuntroi.
La Jonta provinziela ova l’ann passà, do la veles, dat pro da nuef i cumëmbri dla Cunsulta culturela ladina. Do lege ie l assessëur ladin, Florian Mussner, presidënt de chësta cumiscion. Sun pruposta dla lies cultureles fej pert Hubert Irsara da La Ila y Bruno Senoner de S.Crestina. Sciche esperc dl ciamp ie Lois Ellecosta da Al Plan y Hilda Sottara da S.Martin unic numinei te cunsulta. L lëur da scrivan se à sëurantëut Alexander Piccolruaz de Corvara, che lëura tl Ufize provinziel per la Cultura ladina.
as
