Atualità
Durnwalder de reviers dal’Africa: sanità y educazion
USP – Cun la vijita di proiec tl nord Uganda y tl sud dl Sudan à l Presidënt dla Provinzia Luis Durnwalder finà via ai 16 de fauré si viac de ot dis tl’Africa. “Udan de persona i lëures che vën fai ons giapà la cunvinzion che nosta strategia dla culaburazion de svilup porta fruc” à dit l Presidënt che uel jì inant cun proiec de pitla mesura cun persones de referimënt de crëta sun l post.
L’Uganda ie luegia prinzipela dla culaburazion de svilup da pert dla Provinzia de Bulsan. “Provinzia y Region à ntan i ultimi 20 ani sustenì passa 70 proiec te chisc raions, spendan ite doi milion de euro” sorissea Durnwalder. La culaburazion prinzipela ie nasciuda dl 2008 cun l raion Gulu tl nord dl’Uganda. L’idea ie de chësta culaburazion dëssa jì inant per cin ani ne sustenian nia me proiec singuli, ma cialan de arjonjer n svilup dl raion cun sistem. Pont de referimënt dla culaburazion ie l spedel "St. Mary's Lacor Hospital" che la delegazion provinziela de Bulsan à nce vijita chëst ann. “L spedel ie pont de referimënt per l’assistënza sanitera dla region y l sëul spedel privat che cura zënza se fé paië dai pazienc” dij Durnwalder. La Provinzia de Bulsan juda pea cun finanziamënc, aparac y n program de barat per i culaburadëures.
Dl program de svilup per Gulu reverda nce la furmazion y l sustëni dl’agricultura. “Mpurtanza particulera ti dajons al sustëni di mutons y dla mutans che muessa permò se refé dala viera zevila” à dit l Presidënt do avëi vijità la tlasses y cuatieres di maestri finanziei dal Südtirol. Ntan chësta vijita iel nce unì tratà de proiec nueves sciche l anjenië ite na tlas de computer, na berstot da tisler y na bibliotech per na strutura de furmazion prufesciunela.
Da nuef iel l sustëni da pert dla Comunità Europea te chëst raion. La Provinzia de Bulsan à mandà ite n proiet europeich per sustenì n’agricultura y n zidlé bestiam che va a una cun l’ecologia tl Gulu, tla region dl Burkina Faso y Mozambique. Na segonda pruposta de proiet europeich reverda n sustëni per l’aministrazion dl Gulu y dla Tansania per aministré refudam y la proietazion urbanistica.
Te si viac à la delegazion de Bulsan nce vijità na lingia de proiec tl sud dl Sudan ulache ntan i ultimi ani iel unì spendù ite 850.000 euro de scioldi dl Südtirol. Tlo à Durnwalder nce ancuntà l miscioner Comboni, Erich Fischnaller te na berstot da tisler sustenida dala Provinzia. “Do che chësc raion ie unì delibrerà iel truep muciadives che vën inò de reviers te si luech y adrova n aiut per se fé su na basa da pudëi viver” conta Durnwalder che à tlo vijità na scola y doi scolines finanziedes tres Bulsan.
La vijites tl’Africa ova scumencià tl Kenia ulache l vën danterauter sustenì n zënter de furmazion a Korogocho, un di majeri slums dla capitela keniana Nairobi. Tlo giapa feter 170 jëuni na furmazion. Gran pert se tratel de Mutans cun infezion HIV. Ti raions dl Mount Kenya sustën la Provinzia de Bulsan bele dal 1994 n proiet de svilup cun de ndut 110.000 Euro. Cun nce aiuc dl’urganisazion CTM Altromercato vëniel aldidancuei sentà ierbes y versura che vën laureda y venduda tres la rë dl marcià rëidl. “Tlo ne se tratela nia me de dé da lëur ma nce de na cooperativa de pitli paures che va drët bën” conta Durnwalder. Tl Kenja iel danterauter nce unì vijità na cësa per studënc Massai tla stazion misciunera Narossura.
La delegazion provinziela ie ncuei (17 fauré) ruveda de reviers dal’Africa. De chësc viac puderà nce udëi te n film sun la culaburazion de svilup che ie unì fat sun ncëria dla RAI de Bulsan y dl Ufize provinziel per cuestions de cabinet. L fin dl film ie de prejenté ala populazion dl Südtirol i resultac dla culaburazion de svilup tl mond.
as
Galaria dales fotografies
