Atualità

Scora / Cultura | 22.02.2010 | 11:14

Finà l ann de cumemorazion a Mantova

USP – Avisa 200 ani da canche Andreas Hofer fova unì stlupetà, iel ai 20 de fauré a Mantova unì finà via ufizialmënter l ann de cumemorazion. “On purvà a nterpreté la storia, a fé ancunté i populi y a dé plu forza ala culaburazion sëura i cunfins” à dit l Presidënt dla Provinzia de Bulsan Luis Durnwalder a Mantova.

Deberieda cun i reprejentanc politics dla Provinzies de Bulsan, Trënt y Tirol, iel pra la festa a Mantova nce unì adalerch l ambasciadëur austriach tla Talia, Christian Berlakovits y l ambolt de Gonzaga, Fiorenza Brioni.
L’ann te chël che l ti ie unì dat lerch ala storia per ancunté l daunì ie unì finà via deberieda cun na lingia de autoriteies. Scumencià oven dan n ann pra l Sandwirt a S. Leonhard de Passeier, la cësa ulache Andreas Hofer fova nasciù y for inò iel unì metù a jì scumenciadives y manifestazions per lecurdé la batalies de liberazion. Tla ziteies de Gonzaga y Virgilio ulache Andreas Hofer fova unì stlupetà dan 200 ani, à la delegazions politiches dl Tirol storich zelebrà la fin dl ann de cumemorazion. Tl raion Cittadella iel unì descurì n relief de Hofer. Dan a cënc de persones à i presidënc provinziei Luis Durnwalder y Günther Platter (Tirol) cun la assessëur trentin Franco Panizza rujenà nce a inuem d’autra autoriteies unides adalerch. Da dedò à l storich Meinrad Pizzinini tenì na relazion de lecort. Pra la zeremonia a studënc de Mantova purtà dant pec de mujiga, la mujiga de Bulsan à sunà y cumpanies di scizeri à stlupetà salve n reprejentanza dla federazions tl Triol storich.

Te si bilanz dl ann de cumemorazion à Durnwalder lecurdà che n ne à nia festejà tapes storiches, ma che n à menà descuscions sun la storia dl Tirol y n se à dat ju cun chësta: “Me nscila pudons nce mparé dal’esperienzes”. Durnwalder à nce sorissà che dl 1809 iel unì cumbatù per defënder l’identità dl Tirol. “Aldidancuei ne fajons chësc sambën nia cun ermes, ma cialon de furmé i raions dl’Elpes per l daunì” à dit l Presidënt dal Provinzia de Bulsan.

N fin dl ann de cumemorazion ie nce stat chël de purté inant proiec per l daunì sciche per ejëmpl l nuef ufize dl’Euregio a Bulsan. “Sce stlujessan ju chësc ann dijan ‘chësc iel stat’, fossa dut stat per nia” à dit Durnwalder. Se dajan ju cun la storia y l daunì ntan chësc ann, an arjont scialdi de plu. “L ann de cumemorazion ie stat sciche na funtana pra chëla che on pudù nes ciarië mentalmënter per ti vester ala ndesfidedes dl daunì” à detlarà Durnwalder. De chësc viers la vëij nce l presidënt dl Tirol Platter: “Ala fin de chësc ann de cumemorazion sons ruvei al scumenciamënt de n nuef tëmp de culaburazion. L Tirol deberieda, la region europea, ie plëina de vita y chësc mumënt vala de nuzé”.

Nce l assessëur ladin Florian Mussner à cialà de reviers al ann de cumemorazion: “L tëmp y la vita da ntlëuta pudons tò ca sciche ejëmpl, ajache uni tëmp storich à nce da nes dì zeche.”