Atualità
Sustëni per furmazion prufesciunela
USP – Chiche lëura tl artejanat, ndustria, cumerz o tl turism, ma nce chiche à perdù l lëur o ie tla situazion de mubilità, possa damandé n cuntribut provinziel per se istruì inant tl ciamp dl lëur. La repartizion provinziela per la furmazion prufesciunela dà ora nchin a 1.500 euro. I cuntribuc vën dai ora nchin a despunibltà de scioldi.
L sustëni sun basa dla lege statela 53 dl 2000 y 236 dl 1993 possa damandé chiche lëura pra patron privat. Per damandé chisc cuntribuc ala Provinzia de Bulsan muessen nce viver tla provinzia o lauré pra na firma tla provinzia. La dumandes possa nce mandé ite lauranc che ie te situazion de mubilità o de cassa ntegrazion. Leprò possa nce damandé chiche à perdù l lëur da almanco trëi mënsc y che fova dant pra n patron privat.
L vën dat ora cuntribuc che cuer nchin a 80% de tant che n à paià ite al curs arjunjan nchin 1.500 euro. L vën me dat l sustëni finanziel pra furmazions che costa plu de 400 euro. Acioche possa unì dat ora l cuntribut, ne possa la furmazion nstëssa nia bele vester sustenida cun scioldi publics. Sce l se trata de na furmazion per mudé mestier, muessa l proiet de furmazion revardé n mestier recunesciù a livel provinziel.
Per giapé l cuntribut muessa la dumanda unì azeteda dan che scumëncia la furmazion. La dumandes vën cialedes tres mëns per mëns. Data de referimënt ie ai 10 de uni mëns.
L regulamënt per sëurandé chisc cuntribuc, l cuncors atuel y l formuler de dumanda ie publichei sun la plata internet dla repartizion provinziela per la furmazion prufesciunela www.provinz.bz.it/berufsbildung/. Nfurmazions sëuraprò giaten da Inge Clementi (Tel. 0471 41 69 19), Christof Jaufenthaler (Tel. 0471/41 69 13) y Thomas Prunner (Tel. 0471 41 69 30).
as
