Atualità
Recunëscer per tëmp dificulteies dl mparé
USP - Cun la dificulteies dl mparé, n problem che reverda truep sculeies, se à ncuei (24 fauré) dat ju feter 350 nsenianc y respunsabli de scoles, psicologhes y educadëures. Pra la giaurida dl cunvëni metù a jì dala ntendënza tudëscia, à l assessëura Kasslatter Mur sorissà che la scoles autonomes à i mesuns per lauré sun chisc problems tres la ntegrazion.
L fenomenn de avëi dificulteies a mparé giapa for na majera mpurtanza. Sibe i disturps che nce la gaujes ie drët defrëntes. L fenomenn plu cunesciù ie la dificulteies a liejer, tl’ortografia y a fé conc. L assessëur Kasslatter Mur à rujenà de 1300 mutons y jëuni dl Südtirol che à dificulteies de mparé, la tendënza ie tl lëur de jì suvier. Sun 46.000 sculeies à feter trëi percënt dificulteies. Sce n cumpëida pea mutons cun defizit de giapé ahta y hyperatività, cun leprò limitazions, fajessel ora da cater a ot percënt di sculeies. “Jëuni dëssa giapé la puscibltà de arjonjer si fins scolastics y prufesciunei zënza tenì cont de si dificulteies a mparé” à dit l assessëura ala scola. Cun na bela cumpëida de nsenianc de ntegrazion y si mpëni spezifich tres la prufescionalisazion di nsenianc cun leprò l recunëscer la dificulteies per tëmp, uelen ti jì ancontra a chësc problem.
La scola ne ti ie nia dassëula ala dificulteies dl mparé. La va de lauré deberieda y mëter su na rë de esperc tl ciamp dla furmazion y dla sanità. Aldò dl ntendënt ala scola tudëscia Peter Höllrigl à nce la cunsulënza na bele mpurtanza.
as
