Atualità
Mussner a Roma: recunescimënt per l plann de gestion dl’ega
USP – La normes dl’Europa per l’ega vëija dant che uni raion anjenië n plann de gestion dl’ega. L plann per l’Elpes urienteles ie unì dat pro ncuei (24 fauré) a Roma. “Per nëus se tratovela de ntegré nosc plann de gestion provinziel” à dit l assessëur Florian Mussner, che à ncuei reprejentà la Provinzia de Bulsan a Roma.
L plann de gestion per l raion dl’eghes dl’Elpes urienteles ie unì laurà ora dal’autoriteies per l raion dl Adesc y dl’Adria dl nord deberieda cun la regions y provinzies tuchedes. “L plann tol ite la cualità dla majera eghes, na valutazion generela dla cundizions y nce i pruvedimënc che l ie debujën per mantenì la cualità dl’ega” spiega Mussner.
Da pont de ududa politich iel stat mpurtant de dé pro l plan generel a cundizion che vënie recunesciù nosc plann provinziel. “L Statut de Autonomia nes dà cumpetënza te chësc ciamp y vëija dant na pruzedura drët cumplicheda per dé pro l plann de gestion dl’eghes provinzieles. Ulan perchël vester segures che l plann generel tënie nce conta de nosta situazion” à dit l assessëur. Tl plann de gestion per l raion dl’eghes dl’Elpes urienteles iel ncuei nce unì ntegrà la particulariteies dla provinzies de Trënt y Bulsan.
Da pert dl Minister per l ambient y reprejentanc dla regions tuchedes iel ncuei unì dat pro l plann. Śën muessa chësc plann de gestion unì mandà inant ala Comunità Europea acioche l possa unì cialà do da si esperc.
as
