Economia | 01.03.2010 | 10:56

Assessëures tl majer parch dla tecnologia de Europa: ideies per Bulsan sud

USP – A Berlin y Chambèry tla Franzia à i assessëures provinziei Mussner, Widmann, Laimer, Bizzo y Kasslatter Mur vijità i parcs tla tecnologia. La prima mprescion che la delegazion dla Jonta provinziela à tëut pea ie che l va debujën de n cunzet generel per l zënter de inuvazion y tecnologia che n uel fé a Bulsan sud.

I assessëures provinziei deberieda un reprejentanc dla Business Location Südtirol (BLS) y dl Innovation Park TIS à pudù mparé a cunëscer plu da daujin l "Cleantechpark" tl Hellersdorf de Berlin  y l parch dla tecnologia Adlershof de Berlin, che ie l majer de Europa. Da dedò à la delegazion mo vijità l "Technolac" a Chambèry tla Franzia. Te n’ancunteda cun esperc an nce pudù rujené cie che l unirà fat ora dl aeroport Berlin-Tegel. L viac de studi ie unì fat do che la Jonta provinziela ova te si tlausura tratà la cuestion de nuzé la lerch dla vedla fabrich dal aluminio a Bulsan per n zënter dla tecnologia. “Tlo ons na puscibltà storica de nuzé n raion ndustriel l fajan deventé motor per l svilup y n pusizionamënt nuef dl Südtirol sciche luegia economica” à dit i assessëures provinziei.

L parch dla tecnologia y l zënter per inuvazion y tecnologia a Bulsan dëssa se adaté a ciamps de lëur plën de daunì. N ulëssa pité lerch a de plu direzions sciche la tecnologia per cuestions alpines, mubilità per l daunì o nce wellnes. Te n segondo parch dëssel me unì laurà su tl ciamp tecnologich dl’energia ecologica. “Te chësc ciamp ie l Südtirol bele śën n raion de model a livel naziunel” spiega i assessëures.

L Park a Bulsan sud dëssa unì metù a desposizion de firmes y ntëurvia dëssa giapé lerch firmes che lëura ti ciamps nunziei. Sëuraprò dëssel nce deventé na luegia de referimënt per istituzions de tueda. “N fin ie nce chël de mëter su na rë a na maniera che l parch svilupeie forzes che tira pea” à dit la delegazion dla Jonta provinziela. A chësta maniera giata l Südtriol na majera mpurtanza sciche raion economich, l unissa pità stieres nueves y l miurëssa la posizion dla provinzia per firmes nternaziuneles tl ciamp dla inuvazion, tecnologia y energia ecologica.

as

Galaria dales fotografies

Vijita tl parch dla tecnologia de Berlin: (d.m.c.) Mussner, Hardy Schmitz, diretëur dl parch Adlershof, Widmann, Bizzo, Laimer y Kasslatter Mur cun Bernd Ludwig, diretëur dl zënter per photonica y otica tl Adlershof.