Frabiché | 02.03.2010 | 15:11

Normativa nueva per sëurandé lëures publics do mestieres

USP – La Jonta provinziela à dat pro na normativa nueva per sëurandé lëures publics spartì su do mestieres, ti unian ancontra ala firmes da tlo respetan purempò la normes stateles. L Presidënt Durnwalder y l assessëur Mussner à ncuei (02 merz) prejentà la nuviteies che juda a seguré stieres y lascia sën riesc sëurandé lëures publics.

Do che l Guviern a Roma ova arbassà la sëida dl custimënt aldò de chël che l muessa unì fat n cuncors per sëurandé lëures publics ova l Presidënt dla Provinzia de Bulsan de utober 2009 adatà la normes provinzieles. Ntan l’ultima enes ie unì su gran descuscion co che n possa la mëter a jì che i lëures publics tla provinzia possa mpomo unì sëurandai ala firmes da tlo che ie de mëndra mesura. Tla senteda dl prim de merz (inier) à la Jonta provinziela dat pro i criteries aldò de chëi che de majeri lëures possa unì spartì su do mestieres. “Chësc ie mesun sce la spartizion ie mutiveda aldò, sibe da pont de ududa de urganisazion di lëures, da pont de ududa tecnich y per l finanziamënt” à spiegà l assessëur Florian Mussner.

La Jonta provinziela à nterpretà na sentënza dla suneria costituzionela che lascia pro la spartizion di lëures scebën che l muessa unì tëut n cunsciderazion l custimënt de ndut. Per ejëmpl sce n spartësc n lëur da 10 milion te 10 loc, muessa chisc mpomo unì scrì ora a livel de Europa. “Nce a Trënt an ai 12 de fauré adatà i criteries per scrì ora lëures sciche udù dant da Roma” à sorissà Durnwalder.
La normes plu a puntin co che la Provinzia, chemuns y comuniteies raioneles possa sëurandé lëures publics iel publicà sun la plates internet provinzieles.

La sëida per messei tò ie la pruposta de cin firmes (mpede 10) resta nsci da 40.000 euro a n custimënt de 500.000 euro - mpede na milion sciche l fova plu da giut. “Pernan che l se pieta na puscibltà cialerons inò de ruve de reviers ala sëida de na milion” à sorissà Durnwalder. Per lëures danter 0,5 y 4,854 milion de euro uelel vester n cuncors a livel naziunel. Per mo n majer custimënt, sëura 4,854 milion muessa l cuncors unì scrit ora a livel de Europa.

“La nuviteies nes ie unides metudes dant dal Stat y dala Comunità europea, ulon nce les udëi sciche na puscibltà” à dit l assessëur provinziel ai lëures publics. Cun la normativa provinziela nueva an stlarì truepa melsegurëzes y à dat na fundamënta juridica segura. Per l ann 2010 à la Provinzia de Bulsan prugramà lëures per 334 milion. L prim che n sëurandarà aldò la normativa nueva sarà per la zircunvalazion de Maran. Danter Provinzia, comuniteies raioneles y chemuns fovel tl 2007 unì sëurandat lëures per de ndut 862 milion de euro. “A scrì ora i lëures uniral tenì cont dla carateristiches dl post, destanzes de trasport y criteries de cualità per pudëi sëurandé ala firmes da tlo” à spiegà Durnwalder.

Per lëures sëura 150.000 euro muessa la firmes avëi la zertificazion SOA. Ti luesc ladins iel truep artejans che fej lëures publics ora dla valedes. L assessëur Mussner nvieia chësta firmes a se fe fé la zertificazion SOA per pudëi pité si lëures de bona cualità nce ora dla valedes.

as