Atualità
Klaus Dubis ie mort: cunduel dl assessëur ladin Mussner
USP - Cun la mort de Klaus Dubis pierd la populazion ladina n sustenidëur, na persunalità drët sciazeda y n politich de gran savëi” Cun chësta paroles unerea l assessëur provinziel ladin Florian Mussner y l presidënt Durnwalder te si cunduel Klaus Dubis, mort ai trëi de merz. Ël fova stat cunselier provinziel, assessëur regiunel y ova nce purtà inant la fundazion dl Istitut culturel ladin Micurà de Rü.
Klaus Dubis à laurà te truepa istituzions y cunsëies, dal Chemun de Maran, al Cunsëi provinziel, tla Jonta regiunela, Cumiscion di sies y di dodesc. Daniëura se al dat ca per l bën dla cumenanza y per n svilup positif dl Südtirol. Nsci scrij Durnwalder y Mussner te si cunduel. L lecort a Dubis fej pensé a si mpëni per la jënt, si cumpetënza, si despunibltà a judé y si bona maniera de vester.
Deberieda cun Franz Demetz ova Dubis nce purtà inant la lege provinziela per mëter su l Istitut culturel ladin Micurà de Rü. “Daniëura ie ël stat n cumpani y sustenidëur dla jënt ladina” scrij Mussner. Sciche lecorda nce l’assessëura Kasslatter Mur ie Dubis stat un di uemes de gran mpurtanza a mëter mpe l’azienda de radiotelevijion per l Südtirol RAS ulache l ie nce stat presidënt de unëur. Dl lëur dla RAS se nuzea la populazion nce per udëi y audì la trasmiscions ladines.
as
