Atualità
Assessëures ala mendranzes Viérin y Mussner per n lauré deberieda
USP – L assessëur ala mendranzes dla Val d’Aosta Laurent Viérin ie unì a Bulsan per ancunté l assessëur ladin Florian Mussner. Danter l barat de esperienzes n cont dla situazions dla mendranzes iel unì cuncretisà la prejënza dl assessëur Mussner pra l festival dla mendranzes che sarà ai prims de setëmber tla Val d’Aosta.
La Repartizion provinziela ala Cultura ladina fajerà pea cun n si stont l “Festival des Peuples minoritaires” dai 30 de agost ai trëi de setëmber. L festival tla Val d’Aosta dedichea n di ntier ala grupa de rujeneda ladina. Chësc ie unì ufizialisà n vënderdi sëira, 5 de merz, tl’ancunteda danter i doi assessëures al scola y cultura, stata a Bulsan. Fin primer dl festival ie chël de pité n’ancunteda y n barat danter identiteies cultureles che se sënt unerei de tuché pra n raion che viv si tradizions” à sorissà l assessëur aostan.
Laurent Viérin y Florian Mussner à nce rujenà dl’esperienzes y dla situazion dla mendranzes tla doi regions, analisan paraleles y defrënzies. “A tramedoi nes stà a cuer l mantenimënt dla particulariteies dla mendranzes, cossa de gran mpurtanza per nia jì sot tl muvimënt de globalisazion” conta Mussner. Tla Val d’Aosta iel danter l Patos, l Franzëus y la rujenedes Walser de plu rujenedes da curé y mantenì.
Argumënt atuel ie per tramedoi assessëures la reforma dla scola auta. L ie unì rujenà de pusciblteies per tenì cont dla rujenedes y cultura de mendranza te chësta reforma. Tl’ancunteda a Bulsan ulache à nce tëut pert l diretëur dla Repartizion ladina Alexander Prinoth cun Alexander Piccolruaz, iesen ruvei a una per ntensifiché la culaburazion danter i doi assessorac. “Ulon mantenì chisc bon cuntac cun la Val d’Aosta y se judé un cun l’auter” nscì la conclujion de Florian Mussner.
as
