Politica | 08.03.2010 | 15:45

Jonta provinziela: 52 milion al turism

USP – 52 milon de euro dl fond provinziel de rotazion dëssa mo chëst ann unì metui a desposizion per l turism. La Jonta provinziela de Bulsan à ncuei (8 merz) nce dat pro la pruposta de vënder azions dla Sel Holding ai chemuns y cunselieres nueves per l’università. Do la senteda dla Jonta à l presidënt Durnwalder ntan la cunferënza stampa unerà l di dl’ëila.

Fond de Rotazion per l turism

La Jonta provinziela à dat pro de sustenì l turism cun duc i scioldi che vën chëst ann metui tl fond de rotazion. (L assessorat per turism ova fermà l paië ora de cuntribuc turistics che ne ruvova da ani nia plu do de paië ora.) Duc i 25 milion de euro che ie chëst ann unì metui tl fond dëssa śën unì mprestei per nvestimënc turistics. Chësc ann fejen cont che l ruva de reviers 42 milion, trëi cherc de chisc scioldi dëssa ënghe jì al turism a na maniera che de ndut saral chëst ann 52 milion de euro a desposizion dl turism.
L’autra pert che ruverà chëst ann de reviers tl fond jirà al cumerz, artejanat y ala ndustria.

Azions dla SEL Holding per chemuns

La Jonta provinziela à dat pro la pruposta de vënder azions dla SEL Holding ai (102) chemuns a na maniera che da 6% pudëssi ruvé de ndut a 20% dl’azions. L ne unirà perchël nia ngrandì l capital. Priorità dëssa giapé i 49 chemuns che va a sëida cun i ruves che vën adurvei per la produzion de strom. Per ëi vëija la pruposta dant de ndut 12% dl’azions. Davia che per i chemuns ne iel deberieda nia saurì cumpré azions per feter 44 milion à i assessëures provinziei udù dant che mesa la soma possa unì paieda ju cun la dividendes (che porta na rendita de 15% al ann). “Te tëmp de 30 ani fej la SEL Holding nvestizions per defënder l ambient te 29 chemuns dajan ora 330 milion de euro. Cun 11 milion al ann ie chësc de plu che l finanziamënt provinziel per i chemuns” à sorissà Durnwalder. La SEL Holding tol ite 25 sozieteies che fej strom. La pruposta dla Jonta vel nchin ala fin de utober 2010.

Università: Nocker reprejentanta ladina

Dan doi enes fova finà la legislatura dl cunsëi de aministrazion dl’Università de Bulsan, de chël che fej pert 9 persones. La Jonta provinziela à fat la pruposta de cin cumëmbri nueves per l cunsëi. La prufessëura Manuela Nocker reprejenteda la grupa de rujeneda ladina. Ëila ie psicologa, à studià dërt soziel y dl lëur, ie dozënta tl’università de Essex tl Nghiltiera, da ulà che la unirà adalerch per la sentedes. Per la ncëria de presidënt à la Jonta provinziela fat la pruposta dl pruf. Konrad Bergmeister che ie injenier, à studià etnologia y ie dozënt a Viena y tla China. Autri cumëmbri iel giurist Adolf Auckenthaler, diretëur generel da dant tla Provinzia. Dal’economia vën l’injenier Pietro Borga (Iveco Defense Vehicle a Bulsan) y Nikolaus Tribus (GNK Driveline de Burnech, ex Birfield). Durnwalder à unerà l bon lëur dl cunsëi da dant y a sorissà la mpurtanza de mantenì la trëi rujenedes tl’università.
L’autra cater posizions tl cunsëi vën curides dal retëur, da n reprejentant di studënc, n reprejentant di dozënc y da n reprejentant dl Stat.

Frabiches dla sanità

Tl program di lëures publics per i proscimi 5 ani à la Jonta provinziela udù dant 33 milion de euro per frabiches dla sanità. La majer pert ie cun 28 milion ududa dant per frabiché inant l spedel a Bulsan.
Te na segonda delibra iel unì dat pro 16 milion per frabiché la pert di liec tl spedel de Schlanders y 10 milion per la pert aministrativa tl spedel de Burnech.

Ëiles tl lëur

N ucajion dl di dl’ëila iel te Jonta provinziela unì fat l cheder dla situazion dl’ëila tl lëur. Pra la cunferënza stampa à la jurnalistes giapà ciofs mimose. La cumpëida dl’ëiles che ti va do n mestier ie auzeda y à arjont 61,7% (permez ai 55% dl ann)2000. Tla Provinzia de Bulsan iesen doi ani bonorives per avëi arjont l travert europeich dl 60%. Da tenì cont iel che na gran cumpëida de ëiles lëura a mez tëmp, cun 37,7% scialdi de plu che no l 5% di ëi. Aldò de nrescides davania l’ëiles mo for 18% demanco. “Nosc nteres y duvier ie de arjonjer che l ne sibe plu deguna defrënza de paiamënt danter ëiles y ëi. Ulon nce che l’ëiles giape la medema pusciblteies de lëur” à detlarà Durnwalder. Per arjonjer chësc fin se damanda l Presidënt dla Provinzia mo plu culaburazion. De chësc viers ie nce la lege nueva sun val valivanza di dërc de utl, śën iesen tl lëur de anjenië l’atuazions. N cont de furmazion ie l’ëiles danora: n cont de arjonjer la matura y de iscrizions al’università iel 56% ëiles.

Ferata per l Überetsch

Te Jonta provinziela iel unì prejentà n proiet de mascima per na ferata danter Kaltern y Bulsan. Aldò l’idea dla firma Leitner de Sterzing dëssa la ferata passé per Eppan, St. Pauls, Sigmundskron, plaza Verdi a Bulsan y nce ruvé nchin ala stazion dla furnadoia de Jenesien. Chësta idea vëija dant che la ferata furneie n pert sun fonz, n pert sun puenc strënc. L custimënt udù danora fossa ntëur 200 milion de euro. “Chësta ie na basa de descuscion. Ulon udëi plu avisa co che n pudëssa la fé, ciuna pertes che la lascia fé doi y do, y sce chemuns y privac pudëssa judé pea tl finanziamënt” à spiegà l Presidënt dla Provinzia. L assessëur de cumpetënza ie unì nciarià de prejenté mo n iede l proiet plu avisa y de tò su cun la categuries nteressedes”.

Respunsabltà te scola 

La Provinzia se pera contra na sentënza n cont de respunsabltà te scola. A Bulsan se a n sculé fat mel ajache n auter l à fat tumé. La suneria à dit che l fossa stat duvier di nsenianc cialé che chësc ne suzede nia y perchël dëssa la scola paië l dann. La Jonta provinziela fej recurs acioche chësc ne devënte nia n cajo de ejëmpl.

Festa culturela “Europeade”

La Provinzia de Bulsan sustën l festival dla cultures y grupes de rujeneda che unirà tenì ala fin del lugio a Bulsan. Unfat sciche l chemun, dà ne la Provinzia 300.000 euro. Plu avisa vën 100.000 euro dal assessorat ala cultura, 120.000 euro dal assessorat per l turism y la merca Südtirol cun sëuraprò mo 60.000 euro dala Region.

as

Galaria dales fotografies

La Jonta provinziela de Bulsan;