Atualità
Jonta provinziela à dat pro na ncrujeda nueva a Pedraces
USP – A Pedraces possel unì fat da nuef la ncrujeda sun l stradon per furné a S. Lenert de Badia. Sun pruposta dl assessëur ai lëures publics Florian Mussner à la Jonta provinziela dat pro lëures per n custimënt de 427.000 euro.
Cun chësc nvestimënt puderà dantaprima curieres y camions che furneda da S. Lenert de viers de Corvara, raidé plu saurì. “Sce chisc mesuns ne muessa nia fé de gran manovres devënta chësta ncrujeda plu segura per duc” spiega l assessëur Florian Mussner. La carateristiches tecniches dates pro dala Jonta provinziela vëija dant de ngrandì la crujeda: la streda statela unirà adateda sun na lunghëza de 100 metri y la streda cumenela de vieres de S.Lenert sun 50 metri. Aldò dl proietant Michele Mischì de Picolin an cialà de nia ruvé massa daujin ala cëses privates, coche l fova unì damandà dal chemun.
Tla ncrujeda de Pedraces, tl chemun de Badia, se stenta la truepa curieres che porta la jënt al lift de S.Crëusc y ala cësa de nascita de san Ujöp Freinademez a Oies. Mpede n rundel, an cris ora de slargë la ncrujeda coche la ie śën. A chësta maniera ne ruven nia tan daujin al residence iló daujin y l proiet ie nce plu saurì da finanzië. Aldò l proiet uniral sun l brac de streda de viers de S.Lenert nce a se l dé vel luegia da lascé l auto dlongia l’ëur de streda. Tla proietazion de chësc lëur an abù na bona culaburazion cun l Chemun de Badia che à nce metù a desposizion mesurazions che fova bele fates.
as
