Atualità
Sezions nueves tla scoles autes ladines: iscrizions nchin ai 31 de merz
USP – La scoles autes te Gherdëina y tla Val Badia pieta per l ann de scola che vën nuviteies. A Urtijëi vëniel pità mujiga y sport, a La Ila na furmazion soziela y pedagogica. Nteressei ala scola auta paritetica ladina possa mo nchin ai 31 de merz se scrì ite per la ann de scola 2010/11.
Sculeies che ulëssa fé na scola auta cun de plu rujenedes, ulache l vën nsenià unfat truep tudësch y talian possa tla valedes ladines crì ora danter trëi scoles. A La Ila pieta l Istitut tecnich cumerziel cun Lizeo linguistich na furmazion nchin ala matura. A Urtijëi iel l istitut tecnich cumerziel Raetia y la Scola d’Ert. Sëuraprò ala sezions tradiziuneles pieta duta trëi scoles autes ladines nuviteies per l autonn. “Na furmazion te de plu rujenedes pieta na bona fundamënta per savëi da se deriejer te n mont for plu globalisà” sorissea l assessëur provinziel ala scola ladina Florian Mussner.
Per l prim iede vëniel tla Scola d’Ert a Urtijëi pità na sezion de mujiga. La scola de Mujiga de Gherdëina pieta aldò de na cunvenzion la pert pratica metan a desposizion strumënc y nseniamënt de suné. Tla Scola d’Ert vëniel nsenià la pert teorica. Sëuraprò ala sezions de scultura, pitura y grafica/design vëniel de setëmber 2010 nsci pità la sezion de mujiga sëuraprò. Ala pert musichela vëniel dedicà 12 ëura al’ena. Nsenià vëniel materies sciche cumposizion, storia dla mujiga, suné deberieda, bal, y sambën suné strumënc. Udù dant iel nce na rotazion tla berstotes dl’autra trëi sezions artistiches. L cunzet vëija dant na culaburazion cun la materies artistiches: “Per n cunzert pudëssa per ejëmpl la sezions artistiches curé la scenografies” spiega l ntendënt Roland Verra. La Scola d’ert pieta a chësta maniera na furmazion artistica sota y tl medemo mumënt n sistem paritetich de nseniamënt, cun leprò rujenedes fulestieres, leteratura y materies scientifiches.
Da nuef tl ITC de Urtijëi iel che la sezion dl sport ie garantida nchin ala matura. Scebën che i sculeies possa jì a fé garejedes o alenamënc, vëniel pità la preparazion al ejam de matura al medemo livel sciche tl’autra sezions. Per i sculeies che ie truep demez da scola uniral pità formes didatiches nueves che se juda nce dla pusciblteies telematiches.
A La Ila vëniel per l autonn pità per l segondo ann na spezialisazion soziela y pedagogica. Chësta pieta na bona basa per mestieres de nseniamënt y tl ciamp soziel. Sculeies che fina via chësta sezion arà nce na bona basa per studië scienzes dla furmazion, te n cuntest paritetich y plurilingual tl Università a Persenon.
L’iscrizions per l ann de scola 2010/11 vën mo tëutes su nchin ala fin de merz diretamënter tla scoles.
Per nfurmazions plu avisa
Istitut tecnich cumerziel La Ila cun Lizeo Linguistich
La Ila
tel. 0471/847252
www.ll-itc-laila.it
Istitut tecnich comerziel ’Raetia’ Urtijëi
tel. 0471/796296
www.schule.provinz.bz.it/hob-stulrich/
Scola d’Ert Urtijëi
tel. 0471/796240
www.schule.suedtirol.it/ks-groeden/
as
