Atualità
Lege sun la valivanza di dërc vën publicheda n merdi
USP – La lege provinziela nueva sun la valivanza di dërc danter ël y ëila vën publicheda n merdi che vën, 16 de merz, tla Gazëta Ufiziela dla Region y va n mierculdi n drova. La nuvità prinzipela de chësta lege reverda la cumposizion de cunsëies che messerà vester valiveda ora danter ëi y ëiles.
N merdi 16 de merz uniral publicà la lege sun la valivanza di dërc y sustëni per l’ëila cun mudazion dla normes, tla njonta nr. 4 dla Gazëta Ufiziela dla Region, edizion nr. 11. La lege à l numer 5 cun data 8 de merz 2010, l di nternaziunel dl’ëila. Chësta lege jirà n drova l di do la publicazion.
Aldò dla lege nueva messerà cumiscions y cunsëies dl Cunsëi provinziel o dl’Aministrazion provinziela vester valiveda ora danter ëi y ëiles. Plu avisa uel chësc di che de ndut, muessa almanco la terza pert di cumëmbri vester dl auter sés. Sëuraprò muessa te uni cumiscion vester reprejentei ëi y ëiles, canche l ie almanco ot cumëmbri, muessel vester almanco doi dl auter sés.
Chësta regulamentazion cumporta de gran mudazions. Dla cumiscions provinzieles, che va dala cunsulta al sport nchin ala cumiscion per la valutazion dl dann ambientel, iel sun 111 cumëmbri, me dodesc ëiles. Aldò la lege nueva ie debujën de amaca 25 reprejentantes nueves per arjonjer la cumpëida de 37 y nscila la terza pert di cumëmbri.
De tel mudazions saral nce pra la 26 sozieteies a partezipazion provinziela. Danter i 58 reprejentanc dla Provinzia ti cunsëies de aministrazion, iel me trëi ëiles. Per respeté la lege nueva y nsci la terza pert di cumëmbri iel debujën de ruvé a 19 reprejentantes.
as
