Atualità
Vijita virtuela tla cëses di parcs naturei
USP – Giapé na mprescion virtuela dla set cëses di parcs naturei tla provinzia de Bulsan: chësc servisc pieta da permò l Ufize provinziel per i Parcs naturei. Ti cialan a fotografies panoramics che mostra la udleda a 360 gradi possen tres internet mparé a cunëscer cie che pieta la singula cëses di parcs naturei jan nce a se cherdé ca nfurmazions spezieles.
Cuntenuc nteressanc dla cëses di parcs naturei ruva tres l mesun de nfurmazion nuef diretamënter tla cëses, dajan ueia a granc y pitli de jì de persona a vijité i zëntri. Chësc se mbincia i respunsabli dal servisc nuef. La prejentazion multimediela ie unida realiseda sun basa de fotografies panoramics te n format a sfera plëina. Da udëi iel danterauter nce la sia veneziana a Tiers o na ntervista cun l geologh Florian Maurer n cont dla proves scientifiches sun Secëda, metudes ora tla nueva cësa dla Parch naturel Puez-Odles te Funes. Drët nteressant ie per ejëmpl nce a ti cialé al jol dl eguia tla cësa dl Parch Rieserferner-Ahrn.
Ti cialé ala vijita virtuela ie drët scëmpl: se nuzan di butons sun l monitor possen ngrandì y smëndrì la fotografia, o la fé raidé inant. Per giapé nfurmazions spezieles tlechel druché sun i ponc de nfurmazion.
Tl internet ie chësta vijites virtueles da abiné al adres www.provinz.bz.it/naturparke o www.provinz.bz.it/natur.
as
