Atualità
Program dla frabiches provinzieles tla valedes ladines
USP – Tl program di lëures publics che la Jonta provinziela de Bulsan à dat pro per l ann 2010 iel nce de plu proiec che reverda la valedes ladines. “N gran pert se tratela de lëures che ie mo debujën per finé strutures che la Provinzia de Bulsan à fat da permò” spiega l assessëur cumpetënt Florian Mussner.
Tl program dla repartizion provinziela per la frabiches da chëst ann iel nce de plu capituli ti luesc ladins, la majera pert de chisc nvestimënc reverda l zënter scolastich a Urtijëi. Tla Cësa di studënc Assudëi uniral mo fat adatamënc ala njinies contra l meldefuech y l plann de evacuazion. Vel lëures saral mo debujën n cont de mubilia y estetiga. L program di nvestimënc vëija dant 139.000 euro per chësta strutura. La Cësa di studënc pieta da albierch a 53 jëuni y tla mensa marendea da 120 a 150 persones al di.
Tl medemo zënter scolastich iel d’autonn dl 2008 unì giaurì ufizialmënter la strutura nueva per l Istitut tecnich Raetia y la scola prufesciunela. Tlo uniral chëst ann mo fat de plu lëures che manciova mo per n custimënt udù danora de 100.000 euro. Chëst ann iel te chësta do scoles feter 210 sculeies.
Pont de referimënt culturel per la valedes ladines dla Provinzia de Bulsan ie l Museum Ladin Ciastel de Tor. Danter proietazions per vel local sot a tiera a a S. Martin y mubilia tla sënta destacheda ududa dant a San Ciascian, iel udù dant n custimënt de 60.000 euro.
Tl barata danter Provinzia y Stat per via de puscions militeres y casermes, uniral nce frabicà tla caserma a Corvara. L Stat dà puscions per l valor che la Provinzia fabrica cuatieres per i saudeies. Chësc barat ie stat mesuns davia che l ie unì tëut demez la naia y i saudeies de prufescion dëssa pudëi viver te cuatieres. Ntan chëst ann iel udù dant nvestimënc de 183.000 euro per cuatieres a Corvara.
as
