Atualità
Film „L secul ladin“ ai 19 y 22 tla RAI de Bulsan
USP – L film sun i ladins ntan l 20esim secul, prejentà da permò cun gran suzes a Bulsan, sarà n vënderdi ai 19 y pona n lunesc ai 22 da udëi l prim iede tla televijion. La se trata de film documenter pe mustré su l destin dla jënt ladina y per se de ju cun na pert scura dla storia ladina.
Ntan la doi gran vieres y dantaldut tres l opzion à la populazion ladina messù fé pea si piec tëmps. La prima viera mundiela à purtà batalies sun la dolomites, l fascism à spartì i ladins y la catastrofa dl’opzion à purtà melcuntentëza y desperazion. L film „L secul ladin“ mostra te doi pertes da 45 menuc testemunianzes de chëi tëmps y conta di capituli scures dla storia ladina. Capituli che vën zënza scialdi scutei via.
La Rai de Bulsan mostra l film n n vënderdi ai 19 y pona n lunesc ai 22 do la nutizies per tudësc, dala 20.20. Pra la premiera ova l assessëur ladin Florian Mussner fat al savëi che l unirà nce fat na verscion tla rujeneda ladina y dadedò ulessen nce nen fé una per ngleisc.
„Nosta jënt à abù ani de desperazion y ciarestia, l ne ie nia plu unì respetà le denità dla persona. L ie debujën de se dé ju cun chisc tëmps y de i dé inant ai jëuni“ à dit l assessëur Mussner pra la premiera, sorissan che „mustré su cie che ie stat uel di dé n cuntribut ala pesc te nosc tëmps“. L proiet de se ju cun la destin di ladins fajan n film ie stat tan grant che sëuraprò al Assessorat provinziel ladin ie nce la Region Trentin-Südtirol zapeda ite per l finanziamënt. La produzion ie unida fata te na culaburazion cun danter la Rai de Bulsan y la firma Produktion West.
I autores dl film Anita Lackenberger y Gerhard Mader cuntà che rujenan cun la jënt se à mo for mustrà l gran mel de chëi tëmps y la tëma. I testimonesc di tëmps ntan la vieres ie tl lëur de murì ora y pra degun auter film ne ti à tan de persones desdì na testemunianza.
as
