Atualità
Jonta provinziela: cherta digitela dl zitadin
USP – La Jonta provinziela à tëut tres i argumënc zentrei dl’acurdanza finanziera cun l Guviern talian, ulache l ie mo debujen de stlarì cuestions. Mo ncuei (22 merz) uniral tenì a Trënt n’ancunteda cun i cumëmbri dla cumiscions di 6 y di 12. De cuntribuc publics, avanz de bilanz, na cherta per l zitadin y dl herbarium dl Vinzentinum iel unì tratà te Jonta provinziela. Argumënt prinzipel ie stata la prejentazion dla studi sun na ferata da Kaltern a Bulsan (comunicat a pert).
Acurdanza finanziera
Dan che l’Aministrazion provinziela de Bulsan marcederà cun l Guviern talian per cuestions che reverda l’acurdanza per l finanziamënt dla Provinzia, se anconten a Trënt cun i cumëmbri dla cumiscions di 6 y di 12. La Jonta provinziela à perchël mo n iede tëut tres i argumënc ulache l ie n pert nce debujën de normes de atuazion. “La se trata de abiné na streda che respeteie sibe l’acurdanza y che l pat de stabilità finanziera” à dit l presidënt Durnwalder. L unirà per ejëmpl tratà dla cëses dl Anas che ne ie nia passedes ala provinzia y chi che ie cumpetënt per la straufonghes de cuntroi radar.
La Jonta à nce tratà prupostes per ruvé a una sun la cumpetënzes n cont dla Posta y dla Rai tudëscia y ladina a Bulsan. Da stlarì iel mplu nce la cumpetënzes danter Provinzia y Cëurt di conc n cont di cuntroi de istituzions che depënd dala Provinzia. La jonta uel nce ruvé a una co la mëter a jì cun ntervënc per judé la populazion tucheda dala crisa economica. N auter argumënt drët sentì ie nce l trasport de refudam speziel ti zëntri de abineda che tla ziteies vën fat da firmes spezialisedes, cossa che ne ie nia mesun per i pitli luesc. La Provinzia se damanda nce de vester sëul pont de referimënt per i cuntroi de igiena y ambient, NAS y NOE, ulache al mumënt iel de plu che à la cumpetënza. Problems da ressolver iel nce n cont di registri per la patent che vën n pert bën curei a Bulsan ma ulache n aspieta suvënz plu mënsc sun respostes da Roma.
Cherta digitela dl zitadin
Per nia messëi for inò fé da nuef la tessera sanitera, tol la Jonta provinziela chësta ucajion per muever n proiet sustenì dal’Europa de fé na cherta universela per l zitadin. “Chësta cherta dëssa unì adurveda a plu manieres, per ejëmpl sciche Bancomat, Skipass, abunamënt per curiera y ferata o per l museum” à dit l Presidënt dla Provinzia.
Nchin ala fin de chëst ann muessa unì fat da nuef la cherta sanitera, ma mpede fé chësc lëur che custëssa 1,5 milion de euro, vëniel damandà ala Comunità Europea de giapé n finanziamënt dal fond per l svilup regiunel y fé na cherta digitela dl zitadin.
Avanz de bilanz
La Jonta provinziela à tëut tres l cont finel dl bilanz 2009 ulache l ie n avanz de 162 milion de euro. Davia che 154 milion ie bele unic udui danora tl bilanz da chëst ann resta me plu 8 milion de “scioldi frësc”. Cun chisc 8 milion ne iel nia l cajo de fé n bilanz de assestamënt, perchël unirà chisc scioldi juntei tla proscima bilanz” à dit Durnwalder.
Paië de reviers cuntribuc
Te caji ulache jënt muessa paië de reviers cuntribuc europeics y provinziei che i ne se ëssa nia merità ruvela suvënz nchin a pruzesc. La Jonta provinziela à dat pro che bele a damandé cuntribuc messeran sotscrì na detlarazion che n paia de reviers l cuntribut sce l vën ora che n ne fova nia a post cun i criteries.
Herbarium tl Vinzentinum
La Jonta provinziela à dat pro de sëurantò l Rupert Huter Herbarium dl Vinzentinum per 99 ani che à debujën de lëures de ressanamënt. Chësta culezion à 132 plantes, 120 plantes da flëura y 12.000 sortes de mustl. L valor ie unì sciazà de feter 4 milion de euro. “Dantaprima per l gran valor scientifich ons ulù che chësc herbarium vënie metù a post” à dit Durnwalder. L ie udù dant che l Herbarium passe pona dal Vinzentinum al Museum naturel.
as
