Atualità

Trafich | 22.03.2010 | 16:53

Prejentà l studi dla ferata Bulsan-Überetsch

USP – L studi per n trasport inuvativ de persones danter l Überetsch y Bulsan ie unì prejentà ncuei (22 merz) ala Jonta provinziela. La pruposta dla firma Leitner de Sterzing vëija dant n MiniMetro da Kaltern nchin a Bulsan. La Jonta provinziela messerà tò na dezijion nchin te sies mënsc.

Trëi firmes, la Leitner deberieda cun Seeste y la "Società Italiana per le Condotte d'Acqua" se à fat valëi de na diretiva europea y lege taliana prejentan n studi per n trasport de persones, metan la Provinzia tl duvier de to na dezijion. “La Jonta provinziela muessa nchin te sies mënsc to na dezijion sun chësta pruposta” à detlarà l presidënt Durnwalder do la senteda dla Jonta provinziela. Per chësta rejon se à i assessëures provinziei lascià prejenté l studi dai tecnics cumpetënc, cossa che vën domesdì nce fata per i ambolc dl raion tucà.

L studi vëija dant doi toc: da Kaltern a Sigmundskoron y l segondo da Sigmundskron nchin sun plaza Verdi a Bulsan. L studi vëija dant na ferata trata da corda che va sun rodes de gumi. Dala trassa prinzipela iel nce udù dant doi braces: un, cun na furnadoia da condles, al autëza dl Eurac nchin pra la furnadoia de Jenesien y l segondo brac da Sigmundskron nchin pra l spedel de Bulsan.

L studi prejentà dal patron y tecnich dla Leitner ie unì fat sun la fundamënta dla vedla ferata che fova bele te chësc raion. Udù dant iel culegamënc uni 7 menuc da Kaltern, che fërma a Gand, Eppan, St. Pauls y pona a Sigmundskron. Chësc prim toch ie lonch 9,6 chilometri y va n gran pert sun la streda dala rodes y nce sot a tiera. N fej cont che la viac durëssa feter 20 menuc.

L custimënt de chësc prim toch ie udù dant de 108 milion de euro cun n custimënt per l mantenimënt de feter 4,1 milion al ann. „Cun 1,80 euro al chilometer te n ann, fossa chësc mesun de trasport scialdi manco cëre da mantenì permez a la curieres cun 2,20 euro o l ferata de Trenitalia che costa 13,50 euro” à sorissà l assessëur Widmann.

L segondo toch jissa da Sigmundskron nchin sun plaza Verdi, tl zënter de Bulsan. Majera pert unissel furnà do l Isarch cun de ndut 7 stazions, trëi pra i puenc. Per chësc toch de feter 5 chilometri adurvëssen 16 menuc. Leprò vëija l studi dant na puscibltà de na furnadoia a cabines danter l Eurac y la furnadoia de Jeneseien. Debeireda cun chësta furnadoia unissa l segondo toch a custé 88,8 milion de euro. L mantenimënt custerà feter 5,4 milon al ann.

Per l assessëur provinziel ala mubilità ie chësc n cunzet drët nteressant per ti vester ai problems de trafich. “Al mumënt cumpedons tlo 15.000 auti al di, on 27 curieres ma mpo vën l trasport publich me nuzà da 8% di pendolares” à dit Widmann che vëija tla codes longes, la gauja de chësta situazion.

Davia che l se trata de n gran nvestimënt de belau 200 milion, vëija la Jonta provinziela na tel idea me realistica sce la vën finanzieda deberieda cun i privac y i chemuns. La firma Leitner à fat la pruposta de curì nstës l diesc percënt.

Tla cunferënza stampa à l presidënt Durnwalder, l assessëur Widmann y l Seeber, patron dla firma sorissa che l ie stat n gran lëur a fé chësc studi, ma che l se trata ntant me de na basa de descuscion. N iede muessa l studi mo unì analisà apuntin da pont de ududa tecnich, stlarì cuestions schiche i grunc da passé, ruvé a una cun i chemuns y abiné n model de finanziamënt. Sce l vën pona tëut la dezijion de fé velch da detel, muessel unì fat n cuncors a livel de Europa. Per i reprejentanc dla trëi firmes ie i argumënc per chësta soluzion dantaprima l puech tëmp da frabiché: trëi ani, che ulëssa di finé per l ansciuda 2014.