Atualità
La revista „Aules“ dedicheda a scola y turism
USP – Tla scoles ladines vën ora chisc dis la revista „Aules“ cun l argumënt prinzipel dedicà ala scola y al turism. La Ntendënza Ladina y l Istitut Pedagogich Ladin à chëst’iede cris ora l argumënt „Scola y turism“, ajache n à ulù n iede traté plu avisa chësta relazion fundamentela per la vita de nosta valedes.
Bele tl articul de ntroduzion se dà l Ntendënt Roland Verra ju cun la cunseguënzes che possa avëi la detlarazion dla Dolomites a patrimone mundiel dl UNESCO. Pona vën l aspet dla relazion danter scola y turism tratà da deplù autores, sibe culaburadëures dla scola, che reprejentanc dla chemunanza de nosta valedes.
Te na lingia de ntervistes, danter l’auter al Assessëur Florian Mussner y ai respunsabli di servijes turistics te Gherdëina y tla Val Badia, proven a capì la cunseguënzes positives y negatives dl fenomenn turistich per nosta scoles. Nce la scoles desmostra si mpëni per traté ativamënter l’argumënt turistich cun deplù scumenciadives, per ejëmpl de simulimpreja tl ITC da La Ila o tla sezion „turism y rujenedes“ dl ITC „Raetia“ de Urtijëi. N possa dì che l tema se destira ora coche n fil cueciun tres duta la revista.
Tla autra sezions vëniel prejentà la scumenciadives plu mpurtantes di servijes dla Ntendënza Ladina y dl IPL, danter l’auter i proiec „Limesbook“, „GRUNDTVIG“, „Ert y Artejanat tla ladinia“ y l „Di dla Scola Ladina 2010“ che sarà na sort de cunfront de esperienzes danter scoles sun la tematiches dl plurilinguism, dla scienzes y dla creatività.
L vën pona nce prejentà na lingia de proiec y ativiteies de nosta scoles y scolines, che ti dà na vivanda particulera ala revista.
Te n nsert speziel vëniel repurtà l test dl referat dl Prufessëur de Università Paul Videsott pra l ultimo „Di dla Scola Ladina“ cun l titul „Cie ladin te scola?“. Per la edizion che vën se à la redazion dla revista tëut dant de traté l argumënt di vantajes y di periculi dl computer y dl internet per nosc sculeies.
as
