Atualità
Sëira sun l'arpizeda ai 25 de merz tl Museum Ladin
USP - Othmar Castlunger y Rainer Clara da Lungiarü prejënta n juebia 25 de merz tl Museum Ladin a San Martin chedri a culëures sun l’arpizeda dl Aconcagua tl Argentina. Cun n dumënia 28 de merz scumëncia i orars da d’instà.
N ucajion dla mostra “Sëura la montes de viers dla libertà” mët l Museum Ladin Ciastel de Tor a San Martin a jì na sëira de chedri a culëures cun Othmar Castlunger y Rainer Clara che dai 10 ai 30 de jené de chëst ann ie stai tl’Argentina. Ëi à arpizà l’Aconcagua, la piza plu auta dl America, che ie tla region de Mendoza. L crëp ie unì arpizà dal parëi nord – est pian via dal ciamp de basa “Plasa Argentina”. L Museum Ladin nvieia duc canc a tò pert ala manifestazion.
N ucajion dla sëira puderan nce vijité la mostra speziela dedicheda al cunesciù alpinist Karl Unterkircher che ova perdù tl 2008 si vita pra na spedizion sun l Nanga Parbat.
Cun n dumënia 28 de merz scumëncia i orars da d’instà tl Museum Ladin. N puderà vijité la mostra speziela “Sëura la montes de viers dla libertà” y l Museum Ladin nstës dal merdi ala sada, dala 10.00 – 18.00 y la dumënia dala 14.00 – 18.00.
as
