Atualità
„Junior Ranger“ di parcs natuei: iscrizions nchin ai 28 de auril
USP – Dé inant la pascion per l parch naturel a jëuni de 10-12 ani acioche i posse deventé partner per l daunì: chësc ie l fin che l Ufize provinziel per i Parcs Naturei deberieda cun i jëuni dla Lia da Mont (AVS) se à l ann passà tëut dant per l prim iede. Do l suzes dla prim edizion di „Junior Ranger“ di parcs natuei, vëniel nce chëst ann pità a chiche se scrij ite nchin ai 28 de auril.
“Raions sota scunanza adrova l sustëni dla persona, i mëndri ie de gran mpurtanza per l daunì” nsci Artur Kammerer, diretëur dl Ufize provinziel per i Parcs Naturei. Chëst ann uniral scumëncia ai 19 de mei cun l’azion di „Junior Ranger“ tl Parch naturel Rieserferner-Ahrn. Tl raion ladin scumëncia l’azion ai 21 de mei tl Parch naturel Scilier-Ciadenat y ai 28 de mei ti Parcs naturei Fanes-Sennes-Braies y Puez-Odles.
La furmazion per deventé Ranger dura 8 dis y ie spartida su danter mei y setëmber. L vën mparà a cunëscer y desferenzië l cianté di uciei, l cumpurtamënt tla natura, cunscidré tieres salveres, manieres de prim aiut, pastelnà cun materiai naturei y cris da maië che nes dà la natura.
L possa fé pea da cinch a chindesc mutons danter diesc y dodesc ani. Tl priesc de iscrizion de 70 euro, iel la massaria per nrescides naturalistiches, l durmì y maië canche n stà ora doi dis y la festa ala fin cun i genitores.
Nfurmazions plu avisa giaten te internet (www.provinz.bz.it/naturparke, www.alpenverein.it) o tl Ufize provinziel per i Parcs Naturei pra Klaus Puntaier. Per i parcs naturei tl raion ladin possen tò su cuntat cun Klaus Puntaier (Parch naturel Scilier-Ciadenat; tel. 0471 417779; klaus.puntaier@provinz.bz.it), Gottfried Nagler (Parcs naturei Fanes-Sennes-Braies y Puez-Odles, tel. 0474 506120, gottfried.nagler@provinz.bz.it). Nfurmazions giaten nce tl Ufize di Jëuni dla Lia da Mont AVS (tel. 0471 303201, jugend@alpenverein.it), ulache n possa nce se scrì ite nchin ai 28 de auril.
as
