Atualità
Diploms per culaburadësses pedagogics dla scolines ladines
USP – Trëi ani se à culaburadësses pedagogics dla Val Badia y de Gherdëina dat ju cun na furmazion per se adaté a si cheder prufesciunel nuef. N mierculdi 31 de merz puderà 35 culaburadësses pië do dala 5 domesdì, tla scolina Salieta a Urtijëi, i diploms dal assessëur ladin Florian Mussner.
Per 35 culaburadësses iel na cualificazion sëuraprò che miurea si lëur da uni di cun la pitla mutans y i pitli mutons. “La culaburadësses à abù n gran mpëni a fé chësta furmazion, se dajan ca nce plu iedesc ntan ala feries per miuré la cualità dl lëur te scolina” sorissea l ispetëura Edith Ploner.
La furmazion spartida su sun 14 modui ie unida fata tla scolines nstësses, tamesa la realtà dl lëur pedagogich. L Istitut Pedagogich ladin à finanzià duta la furmazion che ie unida fata cun 16 culaburadësses te Gherdëina y 20 tla Val Badia.
Per stlù ju la furmazion à la culaburadësses messù dé ju l lëur scrit sun una dla tematiches tëutes tres y purté dant de si aplicazions pratiches tl lëur.
L cheder prufesciunel nuef dla culaburadësses pedagogiches te scolina vëija dant na majera culaburazion pedagogica cun l’educadësses y aiuc tla documentazion di vares de svilup di mëndri. Tres la furmazion scumenceda dl 2007 à la culaburadësses pudù mparé la teoria n referimënt ala pratica n cont de pedagogia, psicologia dl svilup y l lauré adum cun la families. A chësta maniera se adateien tla scolines ladines a chël che ti vën damandà ala culaburadësses pedagogiches tres lege.
I reprejentanc di media ie nviei de tò pert a chësc mumënt de valor
n mierculdi 31 de merz dala 5 domesdì
tla Scolina Salieta a Urtijëi
per dé inant la nfurmazions ala populazion.
as
