Atualità
Cuatieres per la categuria mesana: lëtra ai chemuns
USP – 45 chemuns à damandà de unì tëuc n cunsciderazion per l program di 1000 cuatieres per families cun n davani mesan. Danter chisc iel nce i chemuns ladins de Urtijëi, Mareo y Ciastel. L assessëur Christian Tommasini à scrit na lëtra ai chemuns se damandan che i feje al savëi nchin ai 24 de mei la despunibltà dl grunc da frabiché.
La lista di 45 chemuns ie longia y tol ite i majeri luesc de duta la Provinzia, danter chisc iel nce i luesc ladins de Urtijëi, Mareo y Ciastel. Nchin te doi mënsc muessa chisc chemuns detlaré sce i à grunc per l frabiché alesirà che se adateda per i programs di cuatieres per families cun davani mesan. I aministradëures de chemun muessa detlaré la sort de zona, sce l ie n raion de cumpletamënt o n raion ulache l fova bele unì frabicà. Ala Provinzia iel nce da fé avëi i plans de autazion cun tan de cubatura che ie lasceda pro, la parzeles, la situazion de cataster y de patrons. Da pert provinziel se damanden nce chi che se sëurantol la realisazion, tenian cont de na spartizion giusta danter scumenciadiva publica y privata. L muessa nce unì detlarà sce i cuatieres dëssa uni vendui o fitei.
“Sce i chemuns ne à nia la despunibltà de grunc da frabiché, iel udù dant che l vënie fat n’acurdanza danter Provinzia y chemun per na pruzedura che va plu debota per destiné grunc al frabiché alesirà” scrij l assessëur Tommasini.
700 cuatieres dëssa unì frabichei te chemuns cun passa 10.000 zitadins. Aldò dla cumpëides anagrafiches fossel per i majeri chemun: 330 cuatieres per Bulsan, 120 a Maran, 66 a Persenon y 49 cuatieres a Burnech. Per i mëndri chemuns depëndel dantaprima dala despuniblteies di grunc.
Tla lëtra ai chemuns se damanda l assessëur Tommasini de seguré si nteres per frabiché cuatieres per families de davani mesan y de mandé ite la documentazion damandeda. La Jonta provinziela fajerà ora la prioriteies, i tëmps y la manieres de jì inant cun l program di cuatieres.
as
