Atualità
Valorisazion dl zënter de S.Crestina: dumandes ala populazion
USP – La populazion de S. Crestina ie nvieda a respuender a n cuestioner sun l zënter dl luech che vën mandà tla families mo dan Pasca. L’Assessorat provinziel al cumerz à cris ora S. Crestina sciche prim chemun pilot per nvië via n proiet de valorisazion dl zënter aldò de lege provinziela. Fin de dut l proiet ie chël de lauré ora pruvedimënc y scumenciadives per miuré l’atratività dl zënter dl luech.
La nueva streda de zircunvalazion, giaurida l’instà passà, da ucajion per svilupé n cunzet de co valorisé miec l zënter dl luech de S. Crestina. L’Assessorat provinziel al cumerz à nvià via n proiet per capì y svilupé cie che l possa unì fat acioche l zënter dl luech giape mo n majer valor. “Me fej plajëi de fé al savëi che l Chemun da S. Crestina ie un di puec chemuns te chël che l vën purvà per prim la potenzialità de svilup y de inuvazion dl proiet de cualificazion dl zënter” à dit l assessëur provinziel Widmann.
L ie unì metù su na grupa de lëur cun reprejentanc de plu lies cumerzieles, sozieles y cultureles dl luech. L lëura pea l Chemun da S. Crestina, la Repartizion provinziela per l cumerz, l’Associazion provinziela per cumerz y servijes HDS. L sustëni scientifich vën garantì dal prufessëur dl’università de Trënt Luciano Pilati n culaburazion cun l studio Giovanelli & Partner.
Prima pert dl studi sun l zënter de S. Crestina ie l’analisa dla situazion. Dlongia la cunsciderazion di proiec y di pruvedimënc bele nviei via, vëniel nce damandà la minonga dla populazion. Mo dan Pasca vëniel ora n’edizion speziela dla plata de chemun cun n cuestioner per uni familia. I zitadins ie nviei a dé n si cuntribut ala valorisazion dl zënter dl luech respundan, anonimamënter, a dumandes n cont de bujëns per l zënter o de si maniera de adurvé la vela cumerziela. I cuestioneres puderà unì dai ju te cësa de chemun, tl ufize turistich o tla bibliotech Tres Gruber nchin ai 18 de auril.
Fin de chësta nrescida ie chël de giapé n cheder sun la minonga dla populazion. Per lauré ora l proiet iel mpurtant savëi cie che se n dij i zitadins n cont dla pertes stersces y dëibles dl zënter dl luech o che che unissa azetà vel pruvedimënc.
Aldò dla lege provinziela 7 dl 2000 (articul 3 bis) sun la valorisazion di zëntri storics y la diretives per la cualificazion cumerziela di zëntri storics tla Provinzia de Bulsan, iel cun l mëns de merz 2010 unì metù man de lauré per l proiet de cualificazion dl zënter tl Chemun de S. Crestina. Per chësc proiet se an tëut dant de lauré ora cundizions cuncretes per miuré la funzionalità y l’atrazion dl zënter dl luech. Leprò nce prupostes per dut l luech n cont de svilup economich y cualità de vita.
as
