Atualità
Do Pasca laûrs sön la strada danter Longega y Picolin
USP – Ai 6 d’aurì, defata do Pasca, vëgnel scomencè de majeri laûrs danter Longega y Picolin por fà sigüda la strada dla Val Badia. Por fà chisc laûrs val debojëgn da sarè öna na striara cina ala fin dl ann. Tratan la sajun alta da d’isté gnaràl daurì la strada te tramidui i versc.
Do Pasca gnaràl laurè sön na lunghëza de 220 metri tl raiun da tröpes otes (al chilometer 12 ca.). Te chësc tòch é la strada 6 metri leria; dala pert dessura él n parëi de crëp y dala pert dessot n mür de sostëgn da oć. Le petun de chisc 16 oć é dër stlet y porchël val debojëgn da fà danü le mür che taca pro le parëi de crëp. Le proiet é gnü fat dal ing. Primo de Biasi.
La Provinzia de Balsan prevëiga de scomencè cun i laûrs en mertesc ai 6 d’aurì y jì inant ćina ala fin dl ann. I auti messarà se baratè jö da passè ajache al sarà ma öna na striara daverta. Tratan la sajun alta da d’isté sarà trames les striares davertes.
I laûrs dlungia Picolin, tl comun de San Martin de Tor, vëgn a costè 681.070 euro. L’Assessorat provinzial por i laûrs publics à inćiarié la firma Geo Bau da fà i laûrs sot la direziun de Michele Mischì. Dala pert provinziala é Davide Ziller dl Ofize por les strades responsabl de chisc laûrs.
as
