Atualità
Do Pasca va inant i laûrs sön la strada da Rina
USP – Por en mertesc ai 6 d’aurì à l’Assessorat provinzial por i laûrs publics odü danfora che al vëgnes indô scomencè cun i laûrs por miorè y fà sigüda la strada da Rina. Ara se trata dla secunda pert di laûrs sön la strada danter le punt da Rina y le paîsc da Rina, sön na lunghëza de feter 3,8 chilometri. “Tratan i laûrs c'iararàn de lascè passè i auti le plü che ara va” garantësc l’assessur Florian Mussner.
La strada por rové a Rina é bindebò strënta; no ma les corieres y i camionns se stënta tles otes, mo inće cun l’auto ne n’él nia indlunch meso da jì dant. I laûrs por miorè la strada da Rina é gnüs partis sö te de plü perts. Por fà sigüda y deslarié la strada dal punt da Rina ćina tl paîsc da Rina à l’Assessorat provinzial por i laûrs publics odü danfora n investimënt de indöt 7.473.000 euro. “Chësta strada é te n raiun che ne n’é nia tan stabil, la strada vedla é te n valgügn tòć ma 4 metri leria y da n valgönes perts massa ërta por garantì na buna viabilité y dantadöt la segurëza por les porsones” insciö spliga Florian Mussner le bojëgn de chisc laûrs.
Defata do Pasca scomenciaràn cun la secunda pert di laûrs. Al gnarà laurè dal chilometer 0,54 insö por na lunghëza de 716 metri. Por deslarié la strada val debojëgn de fà danü mürs dala pert dessura y dala pert dessot de strada, implü saràl inće debojëgn de micropà. “Te chësc caje él dër ri da fà sigü le rogn ajache al é daspavënt ërt” spliga le geometer Davide Ziller. Inće sce les condiziuns ne n’é nia scëmples, ne mëss la strada nia gnì spostada. I laûrs dorarà 12 mëisc alaungia cun na palsa d’invern. Le costimënt de chësta secunda pert, che tol ite la preparaziun tecnica, la segurëza tratan i laûrs y i laûrs instësc é de 2.200.000 euro. I laûrs vëgn fać dala firma Wipptaler Bau de Sterzing.
Tratan i laûrs jaràl datrai inće debojëgn de sarè daldöt la strada; porimpò vëgnel garantì che la jënt pois passè da doman, da misdé y da sëra. Chësc é dantadöt important por i pendolars y i scolars.
La pröma pert di laûrs é gnüda stlüta jö l’ann passè d’aisciöda. La strada é gnüda deslariada por 500 metri y al é inće gnü fat danü n pice punt che é 6 metri lunch. Por miorè chësc pröm tòch y les prömes döes otes él gnü programè n costimënt de 1.928.000 euro.
Tl proiet dl ing. Gustav Mischì n’él nia ma gnü tignì cunt de deslarié la strada, mo inće de tó demez l’ërt. Dantadöt tl pröm y tl ultimo tòch de strada él da smendrì pendënzes che arjunj le 14-15%.
as
