Atualità

Politica | 01.04.2010 | 12:30

Finanziamënt ai chemuns de sëida: Durnwalder anconta i ambolc ladins

USP – L aplicazion dl acurdanza de Milan danter Provinzia y Stat, tla pert che reverda n finanziamënt de 40 milion de euro per i chemuns de sëida. De chësc argumënt à l presidënt dla Provinzia Luis Durnwalder ncuei (prim aril) rujenà cun i ambolc di chemuns ladins sëuramont.

L model nuef de finanziamënt dla Provinzia aldò dl acurdanza danter Bulsan y Roma (tlamà acurdanza de Milan) vëija dant che la Provinzia de Bulsan sëurantole mpënies dal Stat ma nce l finanziamënt de scumenciadives y proiec per i chemuns de sëida. Per capì miec co che possa unì adurvei i 40 milions udui dant per chësc cajo se à i ambolc di chemuns ladins sëuramont ncuei (prim auril) ancuntà tl palaz Widmann a Bulsan cun l presidënt Durnwalder. L ie unì adalerch Andrea Franceschi (Cortina), Ugo Ruaz (La Plì de Fedom), Paolo Frena ambold da dant y Oscar Troi ambolt nuef (Col Santa Lizia) cun l ambolt Bruno Senoner, presidënt dla Lia di Chemuns ladins. Durnwalder à mustrà sul bujën de stlarì cun i ministri a Roma sce i 40 milion possa unì adurvei dai chemuns, sciche l semea scrit tl acurdanza, o sce per i raions de sëida fajan na nterpretazion plu lergia dl’acurdanza. Per l chemun de Col Santa Lizia semeiel al mumënt plu rie é ajache l ne va nia a sëida cun la Provinzia de Bulsan.

L Presidënt dla Provinzia de Bulsan à spiegà ai ambolc che i proiec che possa unì finanziei dëssa miuré la culaburazion danter i raions ladins, perchël se aspieten prupostes per scumenciadives cultureles, economiches, de svilup turistich y istruzion. De chësc vieres saral nce debujen de studi per capì esigënzes y ponc critics lauran ora strategies de ntervënt. Sun mëisa iel nce unì metù l fé pea dl’Euregio, cossa ududa de bon uedl da Durnwalder, ma che sarà plu rie da ruvé a una cun la Provinzia de Belun. I ambolc de sëuramont se à tëut a cuer l cunsëi de Durnwalder de lauré ora proiec che taca adum tlermënter cun i autri chemuns ladins y che l va debujën de avëi la cunvinzion de chësc per pudëi se nuzé dl finanziamënt di 40 milion de euro.

 

as

Galaria dales fotografies