Atualità
Sculeies dla cin valedes ladines se à muserà tl hockey
USP - Sculeies dla valedes ladines se à da permò muserà ti juesc nterladins sportives danter reprejentanzes dla cin’ valedes ntëur l Sela. La bela tradizion ie chëst ann unida tenida inant metan a jì n turnoi de hockey danter la scuadres dla scoles mesanes. Tl stadio de Alie (Alleghe) à venciù i sculeies de Fascia dan chëi de Fedom y Gherdëina.
Ti luesc ladins ulache l ie na gran tradizion de hockey iel stat mesun mëter adum scuadres bëndebò cumpetitives, ulache n chësc cont ne iel nia la strutures aldò, se an mpo purvà de garantì na reprejentanza ala pér di autri. Te Fedom an pudù se stizé sun l aiut dl Hockey Club de Alie (Alleghe), tenian cont che i sculeies de Fedom fej pert de na sëula direzion che tol ite deplù chemuns da chësc luech insù nchina te Fedom.
L turnoi de hockey danter sculeies ladins ie sun pruposta dl Ntendënt Roland Verra, unì metù a jì dal cuordinadëur sportif Claudio Dalla Palma de Belun deberieda cun la respunsabla dl sport scolastich dla Ntendënza Ladina Brigitte Pedevilla.
Cin’ scuadres se à cunfruntà te n turnoi „all’italiana“, chël uel dì che uni scuadra à jugà cun duta l’autres. Tl stadio dala dlacia de Alie iel ai 25 de merz 2010 stat mesun udëi de bela partides a n livel tecnich bëndebò’ aut tenian cont dl’età. Ala fin fova la tlassifica di resultac chësta: al prim post la scuadra de Fascia dan Alie, Gherdëina, Ampëz y Badia. Chësta ultima scuadra se à nce merità l recunescimënt dla majera fairness, davia che la à giapà l manco straufonghes de dutes.
Per la premiazion ie unì adalerch l’Assessëura provinziela dla Provinzia de Belun Daniela Templari, l Ntendënt dla scoles ladines Roland Verra, la Assessëura al sport dla Provinzia de Belun Lorenza De Kunovich y deplù reprejentanc dla scoles che à tëut pert.
Per l daunì se an tëut dant de jì inant cun chësta scumenciadiva, plu dessegur inò cun n turnoi de hockey, ma l proscimo iede danter la scoles autes ladines.
as
