Atualità
14% de plu iscrizions tla scoles autes ladines
USP – Per l ann de scola che vën se à tla scoles ladines scrit ite de plu sculeies permez al ann passà. La cumpëida de sculeies jirà de setëmber dantaprima su tla scoles autes ulache l sarà 51 sculeies de plu. “L aumënt tla scoles autes ie n sëni de crëta de viers dla scola ladina” sorissea l assessëur ladin Florian Mussner.
Danter scolines, scoles de ublianza y scoles autes tla Val Badia y te Gherdëina, se à scrit ite 3285 sculeies per l ann de scola 2010/11.
Tla scoles autes ladines, l Istitut Tecnich y Lizeo a La Ila, l Istitut Tecnich y la Scola d’Ert a Urtijëi saral d’autonn 51 sculeies de plu che fej ora n aumënt de 13,9%. La bela cumpëida de 417 iscrizions te chësta scoles autes unerea i respunsabli dla scola ladina. “L aumënt tla scoles autes ie n sëni che diretëures y nsenianc tën l var cun l’esigënzes de nosc tëmps” à dit l assessëur provinziel ala scola ladina Florian Mussner.
N cont de sculeies nueves iel tl Istitut tecnich da La Ila 22 scric ite per la prima tlas, 16 ne n iel per l Lizeo de La Ila. Per la prima tlas tl ITC a Urtijëi se à scrit ite 41 sculeies. 30 sculeies nueves se à per l autonn scrit ite tla Scola d’Ert Cademia, tla prima tlas de chësta scola saral nsci 43% de plu sculeies.
Tla scoles de ublianza iel per n auter ann 1.306 sculeies tl’elementera y 846 tla mesana. Paredlan al ann passà iel avisa 62 iscrizions de manco tla scola elementera, che fej ora 4,7% demanco. Tla scoles mesanes ladines iel alincontra 38 iscrizions de plu, che fej ora 4,7% de plu.
Trajan adum duta la scoles elementeres, mesanes y autes ladines iel 2569 scric ite per l proscimo ann de scola. Permez al ann passà iel 27 sculeies de plu, cun n aumënt de 1,06%.
as
