Atualità
Durnwalder a Roma per la sënta dla RAI de Bulsan
USP - Cun i respunsabli dla RAI à l Presidënt dla Provinzia Luis Durnwalder ncuei (8 auril) rujenà a Roma dla puscibltà de n finanziamënt dla RAI de Bulsan da pert dla Provinzia, dl daunì dla redazion ladina y de tò su de plu culaburadëures.
Tl’ancunteda dl Presidënt dla Provinzia cun Alberto Maccari, respunsabl RAI per la nutizies regiuneles y l scef dl personal RAI Luciano Flussi se tratovela ncuei dantaprima de mëter n drova l’acurdanza cun l Stat, tlameda “Acurdanza de Milan”. Sëuraprò ala regulamentazion nueva per finanzië l’Autonomia iel nce udù danora che la Provinzia sëurantole la finanziamënt dla sënta dla RAI de Bulsan. “L fin dl’ancunteda da ncuei fova de purté dant prupostes ai respunsabli dla RAI” à dit Durnwalder. Ël à prejentà na vijion n cont dla sënta RAI de Bulsan y de co che pudëssa cialé ora l finanziamënt dla Provinzia. “Mo iel massa abenëura per cunedì la prupostes, ncuei ons tëut tres i pro y contra de uni pruposta” à detlarà Durnwalder a Roma. Maccari y Flussi ti à segurà a Durnwalder de purté inant la prupostes ai cunsëies de cumpetënza cun dantaprima l cunsëi de aministrazion dla RAI.
Ncuei à Durnwalder inò metù sun mëisa l daunì dal redazion ladina dla RAI de Bulsan. “Son mo for dla minonga che la redazion ladina dëssa unì destacheda dala redazion taliana per deventé na strutura per sé” à dit Durnwalder. Debujën iel nce de slargë l tëmp de trasmiscion per i programs de rujeneda ladina. “Tramedoi cuestions ie a cunescënza di respunsabli dla RAI y tramedoi ulëssen mëter a jì da nuef sce l vën a se l dé na regulamentazion nueva” spiega Durnwalder. Sce chësta regulamentazion ne vën proscimamënter nia a se l dé, ulëssen mpo marciadé a pert cun la Provinzia per l daunì dla RAI Ladina.
Argumënt dl’ancunteda a Roma ie nce stat la ciarestia de culaburadëures tla sënta dla RAI de Bulsan y l daunì di programisć. Durnwalder à nce purtà dant chisc ponc che Maccari y Flussi à segurà de se cruzië mo ntan chësc ann. “Na bona ie a uni maniera che Macciari à mpermetù de unì mo chësc mëns a Bulsan per se fé n cheder dla situazion” nsci la cuntlujion dl Presidënt dla Provinzia.
as
