Atualità
Durnwalder y l diretëur dla Posta: proiet pilot
USP – L servisc dla posta tl Südtirol dëssa unì miurà, nce sce l se damanda mudazions fundamenteles tl’urganisazion, strutura y cumpetënza. Chësc ie unit ora dal’ancunteda de ncuei (8 auril) a Roma danter la Presidënt dla Provinzia Durnwalder y l diretëur dla Posta taliana Massimo Sarmi.
Trëi garanzies se à Durnwalder ncuei damandà da Sarmi y les à nce giapà: mantenì l’autonomia, miuré l servisc dla posta tla provinzia de Bulsan y che chisc miuramënc possa unì realisei deberieda cun la mudazions tl’aministrazion dla Posta. Fundamënta dl’ancunteda ie stata la pruposta dla Provinzia de sëurantò l abiné adum dla posta y de la spartì ora. “On rujenà nchin a cë pont che l ie l cajo che la Provinzia aministreie culaburadëures y ufizies dla posta” à dit Durnwalder. Davia che chësc fossa n var cun gran cunseguënzes per n tëmp plu lonch uelen n iede arjonjer n miuramënt dl servisc dajan al diretëur a Bulsan plu cumpetënzes y lerch da se muever te cuestions urganisatives.
Sun mëisa iel unì metù de plu modiei per miuré cuncretamënter l servisc. “Ncuei sons ruvei a una che la soluzion plu da fundamënt fossa de tò un de chisc modiei y dl purvé ora te n raion” à dit l Presidënt dla Provinzia. Aldò de chësta esperienza pudëssen pona miuré l servisc te duta la provinzia. “Da pert dla Posta iesen a una de fé n var de chësc viers” à detlarà Durnwalder.
as
