Atualità
Desgrazia tla Venuesta: cunduel dla Jonta provinziela
USP – La Jonta provinziela à tëut su cun desperazion la nutizia dla desgrazia dla ferata dla val Venuesta danter Kastelbell y Latsch. L presidënt Luis Durnwalder cun i assessëures Widmann y Theiner ie riesc furnei sun la luegia dla desgrazia: “la grupes de prim aiut ie per fertuna ruvedes riesc sun l post, l prim aiut de chëi che se à fat mel ie jit drët bën” à dit Durnwalder.
Danter Kastelbell y Latsch ie la ferata, mueta dala 8.20 a Mals, ruveda pra na smueia y jita sëura la scines ora. N vagon se à permò fermà de traviers sëura la scines. Mo for cuer tiera, sasc y lëns la ferata. Scuadres de prim aiut de duta l’urganisazions ie tl lëur de tò ora la jënt dala ferata.
“Tenian cont dla tragedia ne possen nia rujené de fertuna, ma almanco pudons udëi che l sistem de prim aiut à funziunà drët bën” nsci l Presidënt dla Provinzia sun la luegia dla desgrazia. Duta la grupes de prim aiut ie riesc states sun l post, la persones tuchedes à giapà assistënza, i morc vën – al mumënt rejonen de set – vën trai ora dla ferata.
“Nosc sentimënt de cunduel ie te chësc mumënt sambën pra chëi de familia, nce sce te chësc mumënt ne pudons mo nia di cun segurëza tanc che l sarà” à detlarà Durnwalder “A uni maniera fajerons dut cie che ie me mesun per judé chëi de familia”. A chëi che se à fat mel ti mbincia i cumëmbri dla Jonta provinziela che i posse tosc varì.
Sun streda per arjonjer la luegia de desgrazia ie ntant nce l minister al trasport Altero Matteoli. De plu nfurmazions vën te chësc mumënt dates te na cunferënza stampa.
as
