Atualità
Prim bilanz dla desgrazia dla ferata venuesta
USP – 9 morc, 7 che se à fat mel dassënn y 21 n pue’ manco: chësc ie l bilanz dla desgrazia dla ferata tla val Venuesta suzeduda ncuei (12 auril). Tosc do la 9 da duman iel danter Kastelbell y Latsch unit ju na smueia che à curì la ferata cun tiera y paltan. L Presidënt dla Provinzia y respunsabl dla Prutezion zevila à fat n prim cheder dla situazion.
Me cin menuc do l prim alarm dla desgrazia dla ferata venuesta fova la grupes de prim aiut bele sun l post. “Do nosta recostruzions muessa la desgrazia vester suzeduda puech do la nuef da duman, dala 9.03 ie unì dat la prim alarm, dala 09.08 fova la grupes de aiut bele sun la luegia dla desgrazia” spiega Durnwalder. La desgrazia ie suzeduda te na luegia ria de ruvé permez, perchël an n iede messù se fé streda. “La ferata, de chëla che l prim vagon ie ruvà sëura l rone ju, ie riesc unì segurà, l rone sëura la luegia de desgrazia ie ënghe unì segurà y la persones che se à fat mel ie unides secudides” à detlarà l Presidënt dla Provinzia.
Destudafuech, judacrëp, scuadres de aiut tl’ega, prim aiut, curator d’anes y uemes dla polizai ie ruvei adalerch. Na bona ie stata che dan cater ani fovel unì fat na prova de prim aiut te chësta luegia. “A chësta maniera iel unì fat n bon lëur per purté aiut” à sorissà Durnwalder che ie ruvà sun l post deberieda cun i assessëures provinziei Widmann y Theiner. “A duc chëi che à judà pea pudons ti sentì gra dassënn” à dit l Presidënt, “ncuei à ëi inò n iede demustrà de vester anjeniei per uni bujën”. “Nosc rengraziamënt ti va nce ai patrons de lëur di ulenteres, zënza si cumprenscion ne fossel nia mesun avëi na tel urganisazion dla Prutezion zevila” à dit Theiner, sorissan che l se trata de na catastrofa.
L jì a tò la persones che se à fat mel y i morc ie stat defin rie ajache i vagons fova curii nchin a n meter y mez da tiera y paltan. “Dala 12.20 an mo tëut ora na persona, speron che l sibe veramënter l ultimo de chëi che se à fat mel. L Servisc provinziel de prutezion zevila à njenià n numer de cuntat debant (800 751 751) per parënc de chëi che se à fat mel y di morc.
“Ntant nes à la Prutezions zevila de Stat pità si sustëni, ma la luegia de desgrazia ie bele segureda y la vitimes ie unides purtedes al segur” à dit l Presidënt. Dala cater domesdì uniral mo tenì na cunferënza stampa tl chemun de Kastelbell-Tschars per prejenté mo d’autri particuleres sun la desgrazia. Per la 6 domesdì se anconta la Jonta provinziela per na senteda straurdinera per traté dla desgrazia. “Aldò dla situazion dl mumënt ne fova na tel desgrazia nia da udëi danora, nce ajache l rone dessëura fova unì segurà dai sasc” à dit Durnwalder. L semea che l sibe stat ega a fé muever dut l rone. “Uni doi ani vën cialà do i ronesc che ie sëura y sota la scines, ma te chësta luegia ne fovel nia da udëi pericul” à dit l assessëur Widmann. “Na tel desgrazia, ulache na smueia abina na ferata ntan che la furnea, ne se ëssen nchin a ncuei nianca nmaginà” à dit Widmann, lecurdan che ntant iel nce unì metù a jì n trasport alternatif cun curieres.
as
