Atualità

Desvalì | 12.04.2010 | 17:42

Desgrazia tla Venuesta: vitimes dl Südtirol

USP – La nuef persones che à ncuei (12 auril) messù pierder la vita tla desgrazia cun la ferata ie dutes dla val Venuesta. Chësc à fat al savëi l Presidënt dla Provinzia Luis Durnwalder te na cunferënza stampa tl tert domesdì, n prejënza dl minister talian al trasport Altero Matteoli. Nce la persones che se à fat mel ie dla provinzia de Bulsan, me doi vën da oradecà.

Durnwalder à fat referimënt al prim bilanz de vitimes dla desgrazia dla ferata dla val Venuesta danter Kastelbell y Latsch. Nuef morc, trueps de chisc jëuni, y 28 persones che se à fat mel, 7 de chisc se à fat dassënn mel. “Te chësc mumënt ne pudons mo nia vester segures che sota i vagons ne sibe nia ruvà zachei, ajache i vagons ne à mo nia pudù unì auzei demez” à dit l Presidënt dla Provinzia.

Durnwalder à mo n iede abù paroles de cunduel per i parënc dla vitimes: chësc da si pert, da pert dla Jonta provinziela y da pert dla duta la provinzia. “Cun la families plurons nce nëus y mbincion a chëi che se à fat mel dut l bon y che i posse tosc varì” à dit l Presidënt.

Mprescion à fat la testemunianza de solidarietà da pert dl minister Matteoli y dl scef dla ferata taliana Mauro Moretti, che ie tramedoi ruvei tla val Venuesta per se fé n cheder dla situazion. Matteoli à metù a cuer tan damat pitla che ie la puscibltà de na tel desgrazia “Che l suzede velch da de tel ne fova nia da udëi danora” à dit l minister talian. L scef dla ferata talian Moretti à rujenà dla puscibltà de mëter a desposizion la mascins per auzé demez l vagon.

L geologh provinziel Ludwid Nössing à do avëi vijita dla luegia, spligà co che la desgrazia ie unida a se l dé. Bonamënter per via de eghes che se ova trat ite te fonz, ie unida ju na smueia cun gran sgors sun la scines. “Sce la ferata fossa nce me passeda diesc secunc dant, ne fossel suzedù nia y n menut plu tert ne ëssa la ferata nia pu giapà strom” spiega l diretëur dla ferata dla val Venuesta, Helmuth Moroder de Urtijëi.

L Presidënt Durnwalder à mo n iede auzà ora tan bën che à laurà la scuadres de prim aiut. “La coordinazion ie jita zënza disturb, danter alarm y ntervënt iel me passà puec menuc” à rengrazià l Presidënt duc chëi che à judà.