Atualità
Respostes dla jënt de S. Crestina nchin ai 18 de auril
USP – A S. Crestina iel unì muet cun n proiet de valorisazion per miuré l’atratività dl zënter y la cualità de vita. Prim var de n studi sun scumënciadiva dl Assessorat provinziel al cumerz ie l'analisa di bujëns, pertes stersces y dëibles. La populazion ie nvieda a respuender nchin a n dumënia 18 de auril al cuestioner che ti ie unì mandà n cësa.
Danter i sies chemuns piloc che ie unic cris ora dala Provinzia de Bulsan per nvië via n proiet de valorisazion dl zënter, ie S.Crestina danora. La prima pert dl studi reverda l tò ite nfurmazions sun la situazion y sun la minonghes. Tres n cuestioner ie la populazion unida nvieda a dì la sia n cont dla situazion dl zënter y si maniera de adurvé la vela cumerziela. “L fej plajëi che S. Crestina ie bele tan inant, chëst dà nce rejon al avëi cris ora chësc luech danter i chemuns piloc per la valorisazion di zëntri” sorissea l assessëur provinziel Thomas Widmann.
“Do la prima sajon da instà y da inviern cun la streda de zircunvalazion nueva iel l drë mumënt per pudëi muever dal'esperienza fata y lauré ora vijions per l daunì” sorissea l ambolt Bruno Senoner. La Provinzia finanzieia feter dut l proiet de valorisazion, per l luech iel n’ucajion de tenì pea per arjonjer n cunzet generel, aldò de chël che n puderà realisé de plu pruvedimënc.
“Ulon lauré sun l’atratività cumerziela dl zënter ajache l ie na pert zentrela che tira pea l’economia de dut l luech” spiega l diretëur dla repartizion provinziela per l cumerz Hansi Felder.
La respostes dla populazion al cuestioner unirà analisedes da esperc dl'università de Trënt y piterà la fundamënta per lauré ora n cunzet de pruvedimënc aldò de chël che l’aministrazion puderà se muever tl daunì. Dla minonga dla populazion uniral nce tenì cont ti proscimi vares dl studi, chësc ie garantì tres an grupa de lëur cun passa 20 cumëmbri, metuda adum da reprejentanc dla grupes economiches y sozieles dl luech, deberieda cun l’aministrazion chemunela.
La populazion de S. Crestina ie nvieda a se nuzé de chësc proiet de valorisazion, dajan ju l cuestioner cun la respostes nchin a n dumënia 18 de auril te cësa de chemun, tl ufize turistich o tla bibliotech Tresl Gruber.
as
