Atualità
Jonta provinziela: merdi di de duel per duta la Provinzia
USP – Te na senteda straurdinera à la Jonta provinziela fat ora de plu azions de cunduel per la vitimes dla tragedia dla val Venuesta. Nsnuet à l Presidënt dla Provinzia prejentà cie che la Jonta fajerà te chësta situazion de plura.
La Jonta provinziela uel judé la families dla vitimes sce i à problems finanzieres. “Ulon riesc lascé analisé sce l ie caji finanzieres ala strëntes y pona riesc judé, mo dan’ i pruzesc che possa nce duré dassënn giut” à spiegà Durnwalder. Sce l ie situazions de bujën, sibe pra la families di defonc che nce pra chëi che se à fat mel, uniral riesc judà.
N merdi sëira uniral tenì na santa mëssa de duel a Schlandres. A una cun l vëscul ie unì fat ora de tenì chësta mëssa, duman merdi sëira dala 19.00 per duta la vitimes dla desgrazia. L unirà nce adalerch l vëscul Karl Golser.
La bandieres de duta la istituzions provinzieles unirà duman me trates su a mesa autëza. I ufizies provinziei dëssa spënjer si manifestazions nchin do la supeltures.
La Jonta à pona nce fat la pruposta che la senteda dl Cunsëi provinziel, ududa dant da merdi a vënderdi, vënie spënta.
Mo nsnuet (12 auril) à l Presidënt sotscrì doi decrec de prëscia per garantì l trasport publich da Malls nchin a Bulsan. Sun l toch danter Latsch y Kastelbell, ulache ie suzeduda la desgrazia, furnerà curieres uni mes’ëura. La ferata furnerà da Malls nchin a Latsch y nce danter Kastelbell y Maran. Per rumé demez i vagons dla desgrazia cialeran de lauré l plu riesc puscibl per libré la scines.
as
