Atualità
Jonta provinziela dl 12 auril
USP – Na regulamentazion nueva dla cumuniteies raioneles, l plann de emergënza per l trasport de material radioatif y la sëurandata dla cunzescion da fé strom a Persenon: chisc ie i argumënc de majer nteres tratei dala Jonta provinziela ai 12 de auril, dan che n se à fermà per via dla desgrazia dla ferata tla val Venuesta.
La Jonta à dat pro la regulamentazion nueva dla cumuniteies raioneles tres chëla che l unirà danter auter smëndrì la cumpëida di cumëmbri ti cunsëies. La pruposta de lege unirà śën data inant al Cunsëi di chemuns y al Cunsëi provinziel per la valutazions. „Spere che n ruve prësc a traté chësta lege, tenian cont che do la veles de chemun unirà i reprejentanc dla cumuniteies raioneles numinei da nuef“ spiega l presidënt Durnwalder. Aldò dla pruposta dëssa la cumpëida di cunselieres unì smendrida da 232 a 155, la jontes arà mo 5 cumëmbri (ora di majeri raions cun passa 80 mile zitadins, sciche Bulsan). Tla cumuniteies che reverda i chemuns ladins, Salten Scilier saral 16 cunselieres (mpede 29) y tla cumunità de Puster saral 33 (mpede 37). L cunsëi puderà lité n vizepresidënt de n’autra grupa de rujeneda permez al presidënt.
Trasport de material radioatif
La Jonta à dat pro n’acurdanza de prutezion zevila y ambientela per n plann de emergënza per l trasport de material radioatif. Tlo vëniel udù dant na lingia de pruvedimënc y de ntervënc n cajo de desgrazies. Ultimamënter iel unì cumpedà 35 trasporc danter i spedei dla provinzia de Bulsan.
Cuntribuc per urganisazions de defendura di tieres
Sun pruposta dl assessëur Berger iel unì dat pro criteries nueves per dé ora cuntribuc provinziei per defënder i tieres. De ndut finanzieia la Provinzia urganisazions y strutures privates cun 300.000 euro al ann, plu 650.000 euro per la strutura Sill a Bulsan a gestion provinziela. Aldò dla nueva regulamentazion unirà l custimënt per l dutor dai tieres sustenì diretamënter dala man publica. I criteries nueves vëija nce dant che canche i privac giapa n tier da cësa, ti possel unì damandà 70 euro per n cian y 50 euro per n giat.
Zentrela dal strom a Persenon
La cunzescion dal’ega per la zentrela dal strom Enel a Persenon (produzion de 509 milion de kwh) ie unida data ala SEL. „Permez ala prupostes de cater d’autra sozieteies, ie la minonga la cumiscions tecniches y di chemuns tuchei stata de tò l proiet dla SEL cun pruvedimënc ambientei de cumpensazion per feter 100 milion de euro“ à dit Durnwalder.
Provinzia vënd cuotes Sadobre
La Jonta provinziela à dat pro de vënder si pert dla sozietà Sadobre ala sozietà dl’Autostreda dl Prëner. Tl raion dla val d’Isarch auta, l’A22 fajerà lueges per lascé ju camions y lueges de paussa, che ie de debujen canche se mpifa l muvimënt di majeri mesuns. Cin hectar dl raion dla Sadobre ti jirà ala Provinzia per raions de produzion.
as
Galaria dales fotografies
La Jonta provinziela de Bulsan;
