Atualità
Prejentà i dis de azion “furmazion politica”
USP – Cun 142 scumenciadives uniral dai 23 de auril ai 9 de mei pità i dis de azion per na furmazion politica. La terza edizion de chisc dis de azion ie unida prejenteda ncuei (16 auril) a Bulsan dai assessëures provinziei ala cultura.
La 142 scumenciadives, spartides sun duta la provinzia, vën pitedes tla trëi rujenedes da de ndut 78 urganisazions. L moto da chëst ann ie la solidarietà y snait zevil. I dis de azion dai 23 de auril nchin ai 9 de mei vën nviei via dal Ufize provinziel per la furmazion deberieda cun i trëi istituc pedagogics.
Cun i dis de azion ulons descedé nteres per la cumenanza y ti dé n majer valor, mutivan la populazion tl medemo tëmp nce a pensé pea y a rujené pea” à sorissà l’assessëura Kasslatter Mur pra la prejentazion. Furmazion politica ie na pert dla furmazion generela che n ne possa nia lascé demez. “La democrazia adrova na zitadinanza che sa nëut, nfurmeda y ativa” à detlarà l vizepresidënt talian Christian Tommasini. De chësc viers lëura la Provinzia cun i dis de azion acioche la jënt jude pea a purté inant l svilup dl raion y dl’autonomia.
“Ulon purté n pensier te scola de co se cumpurté de viers dl’autra jënt te na ziviltà. Chësc ie dastramp mpurtant te na sozietà te chëla che muessa se deriejer da pitl insù” à sorissà Theodor Rifesser, dl Istitut Pedagogich Ladin, n reprejentanza dl assessëur Florian Mussner. “N fin ie nce de mustré su co tenì cont dl’idea de solidarietà y snait zevil, l ie n argumënt de chël che uni un muessa se tò si respunsabltà” à dit Rifesser.
L program di dis de azion pieta na vela drët lergia de scumenciadives che va dala cunferënzes ala jites, descuscions, prejentazions de libri y nchinamei cursc interculturei de cujiné. Na scumenciadiva particulera porta l titul "Erzählt und Nachgefragt", cun sies manifestazions dedichedes a solidarietà vissuda y snait zevil.
L program di dis de azion furmazion politica ie nce da cialé do tl internet sota http://www.provincia.bz.it/politische-bildung/aktionstage-2010-cittadinanza-attiva.asp#anc562
as
Galaria dales fotografies
Rifesser: dis de azion "furmazion politica"
- Scarica il file audio 349 kb
