Atualità
Puent nuef danter Corvara y Col Fosch
USP – Sun la streda dl jëuf de Frea, danter Corvara y Col Fosch, à metù man i lëures per fé l puent da nuef. L Assessorat provinziel ai lëures publics fej n nvestimënt de feter 560.000 euro per garantì la segurëza sun chësc puent. L muvimënt de streda puderà ntan i lëures passé per na curta desviazion.
L puent al 14esim chilometer dla streda de Frea, ne garantiva nia plu segurëza assé. “Aldò de mesurazions ne garantësc chësc puent nia plu l pëis di gran mesuns y aldò de analises ne cunvëniel nia plu l cumedé, perchël vëniel śën fat da nuef” spiega l assessëur Florian Mussner. L vedl puent fova dantaldut mel ciafià sun la pertes che tën su: l peton fova scialdi stlupà su, la scines de fier da revin y tuchedes da carbonatisazion. La gaujes per la stleta cundizions dl puent ie majera pert da abiné tl’eghes che ne pudova nia regorer demez sciche toca y che à slavatà ora la strutura dl puent. A fé l vedl puent fovel unì tëut de stleta roles, materiai de stleta cualità y puecia ijulazion pra la jontes.
Sciche spiega l geometer Marco Pinzan dl Ufize provinziel per la stredes tl raion nord-est vën l vedl puent zarà ju defin y fat su da nuef. Tla proietazion à l ing. Michele Mischì udù dant che i lëures posse duré nchin al plu cater mënsc. I lëures vën fai dala firma Impianti Colfosco per 332.240 euro. Cumpedan pea la proietazion y custimënc nia udui danora, iel proietà n custimënt de ndut de 558.560 euro.
L puent proietà da nuef à na lunghëza de 12,6 metri. Tla prima pert di lëures uniral n iede anjenià la desviazion dessëurapert ulache l unirà metù na majera rola per l’ega y jetà pro l ruf cun material. Do avëi curì la desviazion cun asfalt puderà unì spustà l muvimënt di auti y scumencià a tré ju l vedl puent. Permò canche n sarà ruvei a chësc pont puderal unì fat la fundamëntes y dàmpro su dut l puent nuef. L ultima pert di lëures reverda l rumé su dla desviazion.
as
