Laûr | 21.04.2010 | 15:24

Plu riesc lizënzes per lauranc de sajon

USP – Plu debota, plu scëmpl y cun manco burocrazia jirà la pruzedures per giapé lizënzes per lauranc che vën da ora dl’Europa. Tla Provinzia de Bulsan uniral dat ora nchin a 1000 lizënzes de sajon. Da ncuei (21 auril) possa patrons de lëur fé la dumandes. La nuviteies che ie da tenì cont ie unides prejentedes ncuei a Bulsan.

“L dé ora lizënzes de lëur a sajon ie na pruzedura drët cumplessa, che da ncuei jirà plu debota, a na maniera plu scëmpla y cun manco burocrazia” à dit l assessëur provinziel Bizzo te cunferënza stampa. Sciche ti ani passei iel tla Provinzia de Bulsan unì fat 1000 dumandes per lizënzes de sajon acioche lauranc nia europeics vënie a lauré tla gastronomia y tl’agricultura. Chësta dumandes ie nce unides azetedes dal Minister dl lëur. L assessëur provinziel à sorissà che l ann passà iel stat 946 lauranc da ora dl’Europa che à fat la sajon tl Südtirol. A Livel naziunel iel per chëst ann unì metù dant n cuntinjënt de 80.000 lizënzes.

Per l prim iede puderan chëst ann damandé la lizënzes per lëur de sajon me tres internet, sun la plata dl Minister naziunel (www.interno.it). Coche à prejentà l diretëur dla repartizion provinziela per l lëur, Helmuth Sinn, muessa l patron de lëur desćiarià n program per l computer y scrì ora i formuleres. La dumandes possa nce unì fates dal’assoziazions (di paures SBB o di osć HGV) o da cunsulënc de dërt dl lëur. “Na sëula dumanda tleca, sce l sistem funziunea, per giapé la lizënza” à dit l diretëur de repartizion.

La dumandes mandedes ite al Minister unirà pona dates inant ala Repartizion provinziela. Tl medemo tëmp les giapa nce la Cuestua. Dan che la Provinzia dà ora la lizënza, vëniel cialà do sce l laurant respetea nce la cundizions: ntan i ultimi trëi ani muessel bele avëi abù na lizënza per lëur de sajon tla Talia, y l muessa nce avëi da albierch. Dajan pona ora la lizënza vën nce data inant la nfurmazion al’ambasceda taliana tl stat de cësa dl laurant acioche vënie data ora l’autorisazion de ruvé tla Talia. Canche l laurant ruva tla Talia al 8 dis per sotscrì l cuntrat de lëur y de sujurnanza.

as