Atualità
L vën cris families de cura
USP – 332 mutons y mutans vif tla Provinzia de Bulsan pra na familia de cura. Na familia de cura pieta a mutons te situazions de miseria cundizions de vita tl amor nchin che i possa jì de reviers te si familia. Na realtà che à pià pe, ma che adrova plu sustëni y nfurmazion. N cudejel nuef de nfurmazion ie unì prejentà ncuei (21 auril) a Bulsan.
“L fin primer, nsci l assessëur Theiner, ne ie nia me chël de nfurmé a na maniera tlera y scëmpla la families che à bele tëut su zachei y chëles che à nteres de l fé, ma dantaprima de judé families a se sëurantò chësc duvier mpurtant”. Tl ann 2008 à i servijes soziei cumpanià 3.568 mutons y jëuni, 332 de chisc ie unic sëurandai a na familia de cura. I mutons che vif di y nuet pra na familia de cura ie 171 (51,5%), permez a 161 che sta via per l di pra la familia de cura y va da sëira inò a cësa da si familia. De ndut iel tla Provinzia de Bulsan 141 families de cura. Per si servisc ti vëniel dat, aldò dla ndicazions di servijes soziei, nchin a l plu 600 euro al mëns.
La families de cura pieta pruspetives nueves dajan ai jëuni la puscibltà de viver te n ambient familier sann y nton che ti dà crëta y segurëza. Rafurzé y svilupé inant la sëurandata a families ie un di duvieres plu mpurtanc tl cheder de n sistem de aiut y sustëni per i mutons y families che à problems. La sëurandata possa vester cun tramedoi families a una, y ti autri caji tres la suneria di jëuni. La Sëurandata a tëmp plën possa duré nchin a 24 mënsc, che possa me unì slungëi sce l ie de nteres primer dl mut. La se trata de n cunzet defin defrënt dal’adozion, cun chëla che n se fala saurì. Chësc davia che cun la sëurandata ala families de cura, l mut o la muta resta fi de si genitores naturei, y la familia de cura ruva me leprò per judé.
“Per chësta sort de assistënza, ie ti servijes soziei la persones de referimënt”, à spiegà Theiner, che à nce dit che l ie for plu rie abiné families nueves. Tl plann provinziel soziel y te chël per mëndri y jëuni, ie udù dant n rafurzamënt dla sëurandata sciche forza soziela. De chësc vieres iel nce unì fat l cudejel de nfurmazion cun duta la nfurmazions de utl. Nteressei giapa l cudejel dai servijes soziei o dal Ufize provinziel per la familia. La cudejel unirà proscimamënter nce metù online al adres www.provinz.bz.it/sozialwesen.
as
