Atualità
Cunsëi di Ministri dà pro la regulamentazion dl bilinguism
USP – Do avëi scutà l presidënt dla Provinzia Durnwalder à l Cunsëi di Ministri a Roma ncuei (23 auril) dat pro la norma de atuazion al statut de autonomia cun chëla che l’atestazion de bilinguism giapa na regulamentazion nueva tl Südtirol. Da moinla vel nce alternatives al ejam de bilinguism.
„Cun la dezijion di Ministri a Roma iel ncuei finalmënter unì finà via na descuscion che se trajova bele inant da feter diesc ani“ à dit Durnwalder do vester stat te senteda dl Cunsëi di Ministri a Roma. Bele dl 2000 ova la suneria europea nia cunzedù de jì inant cun l’atestazion dl bilinguism tla forma che valova nchinamò. L diplom di ejams metui a jì dala Provinzia fova la sëula atestazion ufiziela per l bilinguism, la suneria se ova damandà alternatives. Chëstes ie ncuei unides dates pro dai Ministri tres n decret lege cun n sëul articul che vëija dant cin paragrafs nueves tla regulamentazion per l’atestazion dl bilinguism. Trëi paragrafs reverda alternatives nueves.Tl daunì vel i diploms nternaziunei de rujeneda unfat sciche i ejams de bilinguism. Chisc diploms vën per tudësch per ejëmpl dai ora dal Goethe-Institut y per talian dal istitut Dante Alighieri. „L ie unì fat na lista dla istituzions de chëles che vën recunëscui i diploms“ à dit Durnwalder. Sce n à n tel diplom me te una rujeneda, muessen mpomo fé l ejam de bilinguism tl’autra rujeneda.
Sciche atestazion de bilinguism de livel „A“, vel nce la matura per talian o tudësch, n cumbinazion cun l studi universiter tl’autra rujeneda. L medem vel nce per n studi universiter n cumbinazion cun n segondo studi o n master.
„Cun chësta dezijion dl Guviern a Roma iel nce tler che la matura dassëula ne vel nia per l bilinguism“ à dit Durnwalder, che sorissea che l ne ie nia la luegia de studi che fej la defrënza, ma la rujeneda che vën adurveda tla lezions y ti ejams. „Per chiche studieia tla Talia, à lezions y ejams per nglëisc, ne ti vel nia l studi per l bilinguism“ spiega l presidënt dla Provinzia.
as
