Atualità
Jonta provinziela dà pro l internet debota nchin a Al Plan
USP – La Jonta provinziela à dat pro la carateristiches tecniches per mëter la roles dla linea internet danter Longega y Al Plan de Mareo. Sun pruposta dl assessëur Mussner uniral metù roles sota tiera per tré tres i cabli de fibra otica. Chësc sarà l prim majer lëur che unirà fat chëst ann tla Val Badia per miuré i culegamënc internet tres linees debota.
La roles per i cabli de fibra otica unirà danter Longega y al Plan metudes sota tiera per na lunghëza de feter cater chilometri. Majera pert uniral sun ëur de streda giavà su n pitl canal per mëter ju trëi de pitla roles ciuledes adum. Aldò dla cuntreda saral te vel lueges nce debujën de se spusté da streda y de se nuzé di puenc. “L fej plajëi che cun l dé pro de chësc lëur da pert dla Jonta provinziel, sons ruvei n var inant per ti pité ala populazion de Al Plan l internet debota tres cabl” spiega l assessëur Florian Mussner. La linea internet debota ie de gran utl per l’economia dla valeda, sibe per l turism, artejanat y l terzier. Sun la linea internet debota aspieta nce la scoles ert y nsci duc chëi che se nuzea dl culegamënt te si vita privata.
I lëures per la roles danter Longega y Al Plan unirà sci ora per na soma de 374.000 euro, l custimënt de ndut ie de 480.598 euro y tol te proietazion y somes de resserva. Coche sorissea l diretëur dl ufize provinziel per nfrastrutures, ing. Marco Springhetti iel proietà de mëter verda dassënn che la streda vënie dopro inò metuda a post zënza che la ne reste bujes.
as
