Atualità
Move it! Cuncors de ideies dl Arge Alp per jëuni
USP – Move it, muev, pea man – l inuem dl proiet ie nce program: Cun chësc slogan nvieia i assessorac ai jëuni di paejes dl’Elpes Arge Alp, sota la presidënza dla Provinzia de Bulsan, a n cuncors de ideies per jëuni. L argumënt dl cuncors ie l respet.
„Nëus duc son na pert dla sozietà. Duc nëus pudon ti dé forma. Per n deberieda de pesc, ie l respet de viers dl’autra persones, dla natura y ambient, ma nce de viers de sé nstësc, la fundamënta zentrela. Cie pudonsa nëus fé acioche duta la persones de nosc paejes se sënt bën? Cie pudonsa mudé per arjonjer plu giustizia? Cie durvonsa acioche l vënie a se l dé plu crëta? Nosta cumenanza ne dëssa nia unì carateriseda da tëma, pessimism, melsegurëza o n pensé reaziuner, chël che adurvon dantaprima ie fidanza, snait, tenì permez, speranza, giustizia, utimism, solidarietà, ntegrazion, libertà... y respet de nëus nstësc, di autri y dl ambient.”
Chësc ie l nvit ai jëuni da 14 a 26 ani ti paejes dl Arge Alp. L puderà unì purtà dant cunzec, dëssenies o proiec che reverda azions de placac, mujiga, film, teater y leteratura. Dut chësc prejentà da singuli, grupes o tlasses de scola. La prejentazion dl cuncors ie nce unida fata sun www.moveit2010.eu (tl internet) tla rujeneda ladina.
La ideies muessa unì mandedes ite nchin vënderdi 4 de juni al adres info@moveit2010.eu. La diesc miëura ideies, aldò de na giuria nternaziunela, giaperà n pest de 1.500 euro.; na soma de scioldi che dëssa judé a realisé l proiet. I proiec che vencerà unirà prejentei la sada ai 19 de juni tl Ciastel Tirol. La plata internet anjenieda aposta dëssa nce vester n mesun per n barat de ideies sëura la sëides che va nce inant sun facebook, twitter o tl blog.
as
