Atualità
Puent nuef sun Jëuf de Sela
USP - L puent riesc sota la cava dl Jëuf de Sela, sun puscion dl chemun de Sëlva, ie tan melciafià che l muessa unì fat da nuef. La Jonta provinziela de Bulsan à sun pruposta dl assessëur Florian Mussner dat pro de fé l puent da nuef y de garantì l muvimënt de streda cun na strutura provisoria.
Aldò dl’analisa sun la segurëza di puenc à chël dl Jëuf de Sela, al chilometer 26,9, giapà gran priorità per unì fat da nuef. Mo de fauré de chësc ann iel unì fat n collaudo y n à cunstatà che la strutura che tën sul puent, cun i trames de peton, ie unida ndeblida mo deplù dal’eghes y sel dl inviern. I resultac dl’analisa de chësta situazion atuela lascia pro che l posse for mo passé mesuns nchin a 33 tones, ma che n possa me plu furné sëuravia a 30 km/h.
La Jonta provinziela à dat pro la carateristiches tecniches per fé n puent nuef che mesura na lunghëza de 10 metri y de ndut 7 metri de larghëza. Acioche l muvimënt de streda posse nce passé ntan i lëures uniral fat n puent provisor de fier. “Davia che l puent ie tan ndeblì ne possen nianca frabiché da nuef lascian furné l muvimënt sun mesa larghëza de streda, nsci messons fé l puent provisor, sce ulon lascé passé auti, camions y curieres ntan i lëures” spiega l assessëur Florian Mussner. La proietazion dl puent, direzion di lëures y mesurazions tecniches vën fates nstës dal Assessorat ai Lëures publics. L custimënt udù danora ie de ndut de 397.000 euro.
as
